«Слово» – Неділя святых отців 1-го Нікейского собора – неділя, 9.00 год.

Перешло чотыридцять днів святой Пасхалной добы. В тім часі Ісус появляв ся ученикам по своїм воскресіню. Бісідовав з нима о Божім Царьстві. Многыма доказами свідчів, же є тот сам воскресшый Господь.

Приошов час посліднього дня перебываня Ісуса з тілом на землі. Ученикам давать послідні інштрукції. Потім їх выводить на Оливну гору. Гору, з котрой было видно і гроб Лазаря. Де ученикы чули: Я єм воскресіня і жывот. Было видно і Єрусалимскый храм і палаць Ірода. А было то і місце, де Ісус взяв своїх учеників по Тайній вечері. Там проливав кровавый пот за спасіня людей.

Теперь приходить з тілом прославленым і ку ученикам говорить: Дана мі вшытка міць на небі і землі. Ідьте, проповідайте, робте учеників зо вшыткиых народів. Ісус возніс ся перед своїма учениками. Тым їм давать далшый доказ – справды є то жывый Бог, котрый пришов на землю.

Ісус своїм вознесіньом выношать людьску природу з глубин аду на высоту, робить чоловіка сосідателя на Божім престолі. А коли ученикы смотрять на небо, ангелы їм звістують: Што стоїте і смотрите? Тадь тот Ісус знова прийде так, як сьте го виділи одходити.

Ту чуєме о тых великых подіях і доказах Хрістового божества. А діавол, тото, што робив в раю, же перекручовав і неґовав Боже слово, робить тото саме. Через вонкашніх мучітелів грозьбами і муками старать ся одвернути од Хріста. Велике множество мучеників поклало за імя Ісуса свої жывоты. Робить і другым способом, жебы одвернути од Хріста – через фалшивы наукы.

Днешня неділю нам припоминать подію скликаня Першого Нікейского собора проти такой великой єресі – блудной наукы. Цільом котрой было одвернути, убити віру в Хріста як Бога, тым розрушыти ціле спасительне діло. Спохыбнити ціле Євангеліє. Діавол выхосновав єдного з тых, котры самы мали учіти і вести ку Хрістови. Александрійскый священик Арій, котрый зачав учіти, же Хрістос не є правдивым Богом. І тота наука як лавина ся перелавила цілым світом.

Коли высохла кров мучеників, котры не хотіли кланяти ся ідолом, діавол выхоснує нове средство – зничіти віру звнутра. Прото 318 отців сходить ся до Нікеї і там торжественоо выголошують сімвол віры, де чуєме слова: гомоузіос то пастрі – єдной бытности, сущности із Отцьом є Хрістос. І так давають хрістіанам напрям, як ся орьєнтовати в тім світі, в тых волнах фалшывой наукы.

Тот собор є актуалный і про нас. І нам отцьове собору і днесь говорять: Не дайте убити Хріста у вашых сердцях ани грозьбами, ани выгодами. Ани через фалшывы наукы. Котрых і в днешній добі є много. Котры старають ся злегшовати, неґовати Боже слово. А ціль є тот самый як в раю, як в часі повстаня мучіня хрістіанів. Як і в часі повстаня аріанізма. Задавити віру в Хріста в людьскых сердцях.

Церьков нас позывать слухати і днешнє Боже слово, де Ісус говорить о своїм єдинстві божества з Отцьом і Духом. Перебудьме віру Хрістови і його слову, не дайме убити Хріста а віру в Нього в нашых сердцях. Слава Ісусу Хрісту!