«Слово» – Неділя святых Праотців – неділя, 9.00 год.

Дві неділі перед праздником Рождества мають назву Неділя святых Праотців а Неділя святых Отців. Хто были праотцьове?

Были то праведникы Старого Завіта, котры одповілы на Боже закликаня до Божоґо Царьства. Спосеред многых посмотьме на приклад святого пророка Даниїла, котрый як молодый хлопець быв взятый до вавілоньского рабства і выростав на дворі царя Набухонодосора. Вєдно з ним были взяты і трьоме младенці, котры тыж были выховльованы на дворі царя.

Наперек тому, же жыли в оточіню поганьскім, ідолопоклоннім, сохранили собі жыву віру. Пророк Даниїл, кедь мав рішати ся меджі тым, ці послухне царьскый приказ, котрый заказовав молити ся ку іншому богу лем ку царьови, або ся выставить на небезпеченство быти шмареный меджі левы, він выберать Бога. Не переставать ся молити каждый день. Його неприятелі лем на тото чекали, оскаржыли го, же не дотримує царьскый закон, і мав быти шмареный меджі левы.

Він принимать приготовленый і смерть за свойого Бога. Но Господь його сохранив, а аж двараз, кедь ся находив кіджі левами. Заткав пыскы левам, і они йому не уближыли.

А коли дав царь поставити золоту статую – соху на полі Деірі, дав наказ, жебы вшыткы люде, котры зачують музичну сімфонію розмаїтых інштрументів, мають пасти на землю і кланяти ся златій статуї. Народы, як то чули, такой падали і кланяли ся. Но тоты трьоми зіставають стояти. Кедь їх привели перед царя, они сміло без страху одповідають, знай, царю, же наш Бог мать силу нас сохранити з огняного пеца, котрый єсь поставив недалеко золотой сохы. Но як кебы так не было, знай, царю, же мы твоїй сохі ся не кланяме.

Так были шмарены до огняного пеца, а зістали непошкоджены. І облечіня на них было не рушене ціле, коли вшли із огня.

Тоты праведникы нас учать, же і нас Господь кличе до свого Царьства. Так в днешнім слові то чуєме в образі гостины, котру приготовив царь. Праведникы послухали тоты закликаня. Не дали ся збаламутити облестныма словами ці обіцянками, ани вывести із міры і покоя грозьбами. Зістали вірны Богу.

Тым указують і нам приклад, быти вірны Богу і не дати ся звести ани обіцянками, богатсвом, выгодами, але ани грозьбами міцьных того світа. Слава Ісусу Хрісту!

В неділю, 25. децембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. децембра 2022 р. о 12.00 год. і 26. децембра 2022 р. о 2.00 год. за русиньскым часом.