«Слово» – Неділя сыропустна – неділя, 9.00 год.

Неділя сыропустна є послідньов недільов, котра нас приготовлять на вступ до святой Чотыридесятніці. Так як опередна неділя, і Неділя сыропустна нам давать хосенны порады.

Або скорше сам Господь через днешнє слово ку нам говорить порады, як найліпше пережыти тот благодатный час. А так, што нам гвоорить днешнє слово?

Постный час характерізуют три пріціпы, котры маме маме мати перед очами: молитва, піст, милостыня. Молитва – усвідомліня Божой близкости, общество з Ним, бісіда з Ним уж од першых моментів рана аж до вечера. Свята Церьков нам давать в постнім часі прекрасны молитвы: як наприклад Молитва переподобного Єфрема Сірійского з поклонами, Літурґія Преждеосвященных Дарів, Покаянаный канон Андрія Крітьского.

Піст – Ісус говорить о помазаню а обмытю. Помазати голову а обмыти тварь. Тоты слова мають і подля отців Церькви духовне значіня. Помазати голову – мати чісты думкы, не задумовати зло. А омыти тварь – мати чісты уста, не говорити то, што приношать шкоду або кривду ближньому, огваряня, посуджованя, а тыж не говорити даремны слова. Заперати уста на зло, а отворяти на добро. Мати чісты очі – заперати очі на зло а отворти на добро. Подобно уха, подобно рукы і ногы.

Милостыня – час посту мать быти веце часом на милосердя. Одопертя собі в їдлі мать вести ку подаваню помочі бідным і голодным. Што Ісус приписує собі – што вы зробили єдному з найменшых, мі сьте то зробили.

Але днешнє слово нам говорить о тім, же над тыма трьома прінціпами стоїть іщі єден прінціп, без котрого вшытко, і молитва, і піст, і милостыня є без хосна. А то – одпущіня. Ісус Хрістос нам в днешнім слові говорить, кедь вы одпустите людям їх прогрішіня, одпустить і вам ваш небесный Отець. Кедь вы не одпустите, ани вам не буде одпущено.

Зато днешня неділя ся называть і недільов прощенія – недільов одпущіня. Жебы сьме до того святого часу вступили без гніву, ненависти, злопамятности.

Дорогы радіослухачі, маме средства на то, як пережыти тот час на хосен нашой безсмертной душы. Є на нас, як то приймеме. Маме молитву, піст, милостыню. Но над тым вшыткым є приготовленость ку одпущаню. Так, як мы ся то молиме в молитві Отче наш – і одпусть нам нашы довгы, як мы одпущаме нашым довжникам. Слава Ісусу Хрісту!

В неділю, 22. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. фебруара 2025 р. о 12.00 год. і 23. фебруара 2026 р. о 2.00 год. за русиньскым часом.