«Слово» – Неділя Томина – неділя, 9.00 год

Пережываме Прадзник Праздників. Світло Хрістово Воскресіня. Тот тыждень называв ся світлий. Бо вшытко є наповнене світлом, як то співаме на утрені. Вшытко є наповнене радостьов.

Ісус появив ся своїм ученикам такой першый день через заперты двері. Приношать їм покій і внутрішню радость. Позывать їх ся пересвідчіти, же справды є то Він. Просить і дашто закусити. Апостолы суть наповнены радостьов. Но не вшыткы. Апостол Тома там не быв. А коли йому народованы повіли, він говорить, покы я ся не пересвідчу через пальці в ранах і руков в ребрі, не увірю.

Так перешов тыждень. На восьмый день знова Ісус пришов, но быв там і Тома. Такым самым способом через заперты двері. Знова приношать покій. А обертать ся з любвов і ласкавым поглядом на Тому і говорить йому: Подь, дай свій палець, влож свою руку до мого ребра. Не будь не віруючій, но віруючій. Тома як тото вшытко видів і чув, скрикнув: Господь мій, і Бог мій.

Ісус тото невірство Томы обертать на добро про нас вшыткых. Тома ся не лем пересвідчів, тым утвердив і нашу віру, но тыж і проповідать Бога не нага і чоловіка не проста. То є Бога і чоловіка в двох природав, єдного Богочоловіка. А тыж не лем чоловіка, але і жывого Бога.

Ісус приходить через заперты двері. В Старім Завіті Мойсей вдарив по воді і народ перешов по сухій землі на Божый приказ. Ту не потребує, жебы хтось робив дорогу, отворив двері. Но приходить днука, хоць двері заперты. Тома ся высловив, кедь не дам… а Ісус поврторює тоты самы слова, котры Тома высловив, коли видом Ісуса там не было. Но быв там невидимо.

Томови уж стачіло, з цілой душы выкрикнув, Господь мій, і Бог мій. А Ісус потвердв тот слова: Ты єсь увірив, бо єсь ня видиів. Ты єсь ся пересвідчів і пальцями і руков. Но блажены, котры не виділи і увірили. Тома свідчіть перед цілым світом, вшыткым ґенераціям правду о Хрістовым воскресіню. Правду о двох природах в Хрістови а правду, же є то тот самый Хрістос, котрый терпив і теперь жыє.

Тот выслов Господь мій і Бог мій є про нас важным, же коли хочеме быти дітми воскресіня, нового жывота, духовного обновліня, і мы маме з цілой душы закричати днесь: Господь мій і Бог мій. Але то єдночасно завязує – не приймати, і одверьговати вшыткы іншы господьства і божества, котры хотять забрати місце в нашім сердці: ці є то гріх, розкошы, привязаности, краса тіла, карьєра, поставліня, пінязі, богатство і вшытко інше, што претендує быти тым господом і богом в нашім сердці. Тома учіть выберати лем єдного Господа і Бога – Ісуса Хріста. Хрістос воскрес!

В неділю, 27. апріля 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. апріля 2025 р. о 12.00 год. і 28. апріля 2025 р. о 2.00 год. за русиньскым часом.