«Слово» – Неділя вшыткых святых – неділя, 9.00 год.

Тыждень по празднику Сосшествія Святого Духа свята восточна Церьков празднує память вшыткых Святых. І перед нас покладать вопрос: Хто є святый?

Кедь бы сьме ся звідовали людей, же хто є святый, може одповіді были бы: То суть апостолы, пророкы, мученикы, преподобны, святы єпіскопи. То суть тоты, котры находять ся в нашім літурґічнім календарю в часі цілого церьковного рока. А одповідь є добра, але не повна. Бо на далшый вопрос, хто може быти святый, може бы зазвучало: То ся мають намагати о святость епіскопи, священикы, монахы.

Знову одповідь добра. Але на вопрос, ці односить ся то і ку мі, можу быти святый? То може бы сьме уж чули, тото не є про нас.

Но што нам говорить Боже слово? На многых місцях чуєме: Будьте святы! А не є то адресоване лем священикам ці монахам. Але каждому віруючому. На службі Божій перед святым причащіньом Святых Тайн чуєме слова: Святая святым. Покликаня ку святости не є лем про дакотрых, але є обовязком каждого хрістіана.

Ісус Хрістос нам в днешнім слові давать навод ку святость. Признати ся ку Хрістови в каждій сітуації, не лем перед віруючіма, але і перед тыма, котры Хріста ненавидять. Быти приготовлены прияти про віру в любов ку Ньому і мукы, і терпіня, пронаслідованя і смерть.

Далше Ісус говорить: Хто незненавидить отця, матірь, не може быти моїм учеником. То є, нич не ставити над любов ку Хрістови, і кебы ішло о нашых найлблизшых. Коли бы мали быти барьєров меджі нами і Хрістом. Або кебы сьме мали рішати меджі нима а Хрістом. Маме поставити Хріста на перше місце в своїм сердці, своїм жывоті, у своїх одношінях.

Так нам ту Ісус Хрістос говорить, што робити, жебы быти святыма, Поставити любов ку Хрістови на перше місце. Быти в тім єдиніню з Хрістом каждый день, в каждім часі. А святый Василій так згорнув тот навод до свох речінь: Вшытко робте на Божу славу. То є, кажду нашу діалность, котру робиме, най робиме з усвідомліньом, же хочу то робити на Божу славу. То в собі мать і утікати од гріха, бо гріх не може быти на Божу славу.

Вшытко робте на Божых очах. В каждій тій діалности памятайме на то, же Бог ня видить. Видить мої слова, мої діла і мої думкы. Перед ним не можу сховати нич.

А так днешня неділю нас позывать не лем ку прославі тых святых, котры нас спередили до вічности, але тыж ку усвідомліню, же і я мам быти святый. А то ся діє через жывот зъєдиненый з Хрістом. Подля слов апостола: Уж не жыю я, але у мі жыє Хрістос. Слава Ісусу Хрісту!

В неділю, 30. юна 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. юна 2024 р. о 12.00 год. і 1. юла 2024 р. о 2.00 год. за русиньскым часом.