«Слово» – Неділя жен міроносительок – неділя, 9.00 год.

Днешня неділя зове ся Недільов міроносительок і праведных Йосифа і Нікодіма. Перед нашы очі Церьков ставить приклад святых жен, котры з великов любвов служыли Ісусови в часі його оголошаня євангелія, не зохабили го ани під крестом.

Кідь Ісус завершыв своє діло на кресті, словами, Отче до твоїх рук давам свойого духа, нахылив голову і оддав духа. І тым указав, же є Паном жывота і смерти. Втогды Йосиф, высокый член рады і тайный ученык, пришов сміло ку Пілатови просячі собі Ісусове тіло на похороніня. Пілат чудовав ся, же так ского Ісус вмер, дав собі перевірити од стотника, i як тот досвідчів, же справды Ісус є мертвый, наказав дати мертве тіло Йосифови. Тот вєдно із Нікодімом сняли тіло, обвинули до полотна і положыли до гроба вытесаного в скалі. Ку гробу привалили великый камінь. Но Жыде собі выпросили і сторож, жебы не могли прийти ученикы і вкрасти тіло, і так повісти народу, же воскрес із мертвых. Дакотры із жен смотрили, де го положыли і в першый день тыждня, в неділю скоро рано ідуть ку гробу. По дорозі бісідують, хто їм одвалить камінь, як они своїма слабыма руками зможуть одвалити камінь. Їх сердця суть наповнены любвов ку Ісусов, но і жальом і слызами. Кідь пришли ку гробу, камінь нашли одваленый. Ангел їм говорить: Вы ся не бійте, глядате Ісуса роспятого? Не є ту, воскрес, як вам повів. Ідьте то повісти його ученикам. По дорозі Ісус сам ся їм появлять, наповнять їх радостьов, а посылать як першы звістователкы воскресіня ку апостолам.

Они ішли наповнены больом і жальом ку гробу, глядаючі мертвого Ісуса, вертають ся наповнены радостьов, кідь стрітили жывого Бога. Ту є посолство днешнього євенгелія і про нас. І мы сьме много раз подобны тым женам. Находиме ся тяжкых жывотных сітуаціях, з нашого погляду безвыходных, Хрістос є про нас якбы мертвый в тій сітуації. І ту зазвучіть тото радосне: Радуйте ся. Я жывый, мам вшытко у своїх руках. Не бійте ся. Будьме мы самы наповнены тов правдов. А приношайме тоту новину радости тому світу. Хрістос воскрес!

В неділю, 22. апріля 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 22. апріля о 15.00, 20.00 год. і 23. апріля о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Жены міроносителькы, Жрідло: Wikipedia