«Слово» – Праздник Преображенія – неділя, 9.00 год.

Праздник Пеображенія нам говорить о події, коли Ісус Хрістос взяв трьов своїх учеників на гору Тавор – Петра, Якова і Йоана. Там ся пред нима переобразив. Його тварь засвітила як сонце і облечіня было біле як сніг.

Свідками той події суть і двоми представителі Старого Завіта – Мойсей і Ілія (Закон і Пророкы). Мойсей прияв табліці Завіта на горі Сінай а пророк Ілія указує велику запаленость за Божу славу в часі, коли процвітало ідолопоклонства ідола Ваала в Ізраілі.

Чом тых двох собі Ісус выберат як свідків свого преображенія? Жыде часто обвиньовали Ісуса з общества з Веелзевулом, началником демонів, коли виділи, як творить чудесны діла. Обвиньовали, же зневажать Бога, называючі себе Сыном Божым, і коли явно одпущав гріхы людей. Обвиньовали го, же не є од Бога. Так Ісус бере тых найзапаленішых за Божу славу в Старім Завіті а они досвідчують Божество Хріста, приходять ку Ньому як рабы.

Ісус тото преображеніє робить про своїх учеників, жебы были підкріплены у вірі, видячі його славу теперь, а і то лем частково, кілько были способны. Жебы, як Його увидять терпіти мукы, не впали на дусі, знаючі, же Він тото вшытко приймать добровольні, а же тото вшытко є до часу.

Дале Ісус робить тоту подію і про нас, указуючі на славу першоствореного чоловіка а што вшытко чоловік утратив, коли послухав злого духа. Але тыж і указати, яка буде наша слава, коли зістанеме вірны Хрістови, коли Він другый раз прийде у славі зо вшыткыма ангелами і святыма.

Так і про нас є тота подія підкріпліньом в нашых тяжкостях, бідах, переслідованях, хворотах, траплінях, знаючі, же вшытко тото є лем до часу. Жебы сьме тогды свій погляд піднимали ку горі тавор.

А тыж послухали слова, котры там звучать од Вічного Отця: Тото є мій прелюбый Сын, в котрім я мам залюбліня, Його слухайте. Жебы слухаючі і жыючі подля Його слова і о нас платили слова: Тогды справедливы просвітять ся як сонце в славі свойого Отця. Слава Ісусу Хрісту!

В неділю, 21. авґуста 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. авґуста о 12.00 год. і 22. авґуста о 2.00 год. за русиньскым часом.