«Слово» – Праздник Сошествія Святого Духа – неділя, 9.00 год.

Днесь пережываме трей праздник Святой  пятьдесятніці. Праздник Сошествія Святого Духа видимым способом на апостілів. Першым з тых праздників є Праздник Пасхы – Воскресіня, котрый празднуєме 40 днів. Другым є Вознесіня Господа на небо. А третім приход Сятого Духа.

Уж першый день, коли ся появив святым апостолам, коли были замкнуты зо страху перед Жыдами, через заперты двері, голосить їм: Мір вам! Покій най панує у вашых сердцях. А далше дыхнув на них і говорить: Приймите Святого Духа, кому одпустите гріхы, будуть одпущены.

Ісус такой першый день давать апостолам через дыхнутя дых Святого Духа. Жебы могли одпущати гріхы. Іщі їх не посылать. Мали чекати на видимый приход Святого Духа. Теперь принимають владу, котра была не подумати про чоловіка. Тадь і Ісуса обвиньовали, коли выздравив невладного чоловіка, словами: Одпущають ся ті твої гріхы. Тогды многы дудрочуть, в думках одпсуджують Хріста, хто то є, же зневажать Бога, собі узурпує право Бога одпущати гріхы.

А ту Ісус давать ту владу апостолам. І їх наступникам єпіскопам і священикам. А на 50-ый день і 10-ый день по Вознесіню, коли ученикы были зобраны вєдно на молитві, сходить Святый Дух видимым способом. Про тых, што были вонка, они чують силный вітор. Позбіговали ся многы, што то ся діє. І ту є вылика Божа благодать, же сходять ся тоты люде, жебы виділи, і жебы прияли слова Петра. А про учеників, котры ся находили внутрі, приходить Дух в подобі огняных языків, котры ся розділили над каждым із них. І они, котры перед тым были перестрашены, Петро, котрый ся острашыв служніці – педіскіс – молоденькой дівчинкы, острашыв ся і тых вояків, коты стверджують – і ты належыш ку ним, теперь сміло выступує перед нимх і їм голосить Євангеліє, а они засягнуты тов несподіванков, кличуть: Мужове, братя, што маме робити? А Петро їм говорить: Покаяйте ся, дайте ся покрестити і будете спасены. І увірило велике множество народа.

Так, як Святый Дух зышов на апостолів, хоче сходити і на нас. Теперь уж не так видимым способом, але в тихости нашого сердця. Хоче і нам дати силу одпущати нашым ближнім. І нам хоче дати силу быти свідками Хріста в тім світі, котрый одвергує Бога і приклонять ся ку діаволу. Выдавати своїм жывотом і словами свідчіня нашой віры, нашой любви ку Господу. І нас хоче очіщовати од скверн і бполота страстей і гріхів.

Так отворьме свої сердця і закличме словами: Царю небесный, Утішытелю, Душе істины, іже везді сый, і вся ісполняяй. Сокровище благых і жызни подателю. Прийди і всели ся в ни. І очісти ны од всякія скверны, і спасе, Блаже, душы наша. Слава Ісусу Хрісту!

В неділю, 8. юна 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. юна 2025 р. о 12.00 год. і 9. юна 2025 р. о 2.00 год. за русиньскым часом.