«Слово» – Праздник Воскресенія – Пасха – неділя, 9.00 год - lem.fm

Днешній день называть ся Великдень. Бо в днешній день празднуєме світле Хрістове воскресіня. Ісус Хрістос пришов на землю із любви ку чоловіку. Вшыткы свої діла робив нам на хосен. Про нас дав ся до рук людей, быв оплюваный, збичованый, терньовым вінцьом вінчаный, бере на себе крест ідучі на Ґолґоту.

Там зношать высміваня од Жыдів і од поганів. А на тото вшытко одповідать: Отче, одпусть їм, не знають, што роблять. Сходить до аду, не як раб смерти, але як Владыка над смертьов. Зничів владу смерти і приніс ослободжіня душам праведників затримованых в царьстві смерти. Їм оголошать: Подьте до мойого світла, до мойого вічного Царьства.

На третій день воскрес із мертвых. Тоту подію мы торжественно прославляме словами преподобнохо Йоана Дамаскина на днешній утрені: Воскресенія день, просвітимся людиє. Пасха Господня, Пасха, од смерти бо ко жизни, і од землі к небесі Хрістос Бог нас приведе, побідную поющыя.

Тоты слова нам говорять, же Хрістос свойов смертьов і воскресіньом зничів трьох неприятелів: смерть, гріх, діавола. Нам подаровав тоту свою побіду. Од нас хоче лем єдно, жебы сьме тоту побіду апліковали на себе. А як?

Коли прийдеме ку Воскресшому, очістиме ся із нашых гріхів і будеме послухняны Хрістовому слову. Коли сьме пришли рано на утреню, вшытко было облечене до білого, ціла церьков, і до світла. А мы радостно співаме тропарь: Хрістос воскресе із мертвых, смертію смерть поправ…

Але дайме собі вопрос: Справды Хрістос воскрес і про мене, про мій жывот? Не є то лем даяка красна традіція? Святкы перейдуть, а нич в моїм жывоті ся не мінить. Тогды бы сьме не мали хосен з Воскресіня Хрістового, а вшытко бы была лем маска, за котров є дале духовна темнота.

Прото жычу Вам вшткым в тот великый і славный день Воскресіня, жебы побіда Хріста была і нашов побідов, коли тото посолство Пасхы приймеме до свойого жывота. Хрістос воскрес!

В неділю, 5. мая 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. мая 2024 р. о 12.00 год. і 6. мая 2024 р. о 2.00 год. за русиньскым часом.

«Слово» – Праздник Воскресенія – Пасха – неділя, 9.00 год

Повязаны дописы

Ретрансмісия V Медженародного Конґресу Русиньского Языка / презентация орґанізаций – четвер, 9.15 год.

«Голосы Русинів Підкарпатя» – середа, 18.10 год.

Łemkowie są…

Спомож нас / Wesprzyj nas