«Слово» – Сема неділя по Сошествії Святого Духа – Неділя о вірі Божому слову – неділя, 9.00 год.

За Ісусом, о котрім по воскресіню Яіровой дівкы ся рознесла новина по цілім краю, ішли двоми сліпы і кричали о помилованя. Ісус спочатку не реаґує на них. Аж кідь вошов до дому, ся їх звідує: Вірите, же можу тото зробити?

Они одповідають: Віриме. А Ісус на то: Най буде так, як вірите. А они провиділи. Потім привели чоловіка німого, опанованого демоном а Він і того выздравив. Народ чудовав ся і фарізеї говорили: Йому помагать начальник демонів. Но Ісус не реаґовав на тоты їх слова. Робив своє: учів, проповідав Царьство Боже і лічів. Творив добро.

І днешнє слово є барз важным про наш духовный жывот. Говорить нам о потребі силной вірі в Боже слово. Тоты Хрістовы слова – Ці вірите..? – суть адресованы і ку нам. Як легко чоловік увірить слову злого, як то видиме од рая. Але вірити Божому слову в каждій сітуації нашого жывота, то выжадує намаганя, тверду віру. Вірити, же Бог мать вшытко у своїх руках. Хоцьшто бы ся нам стало: ці даяка біда, нещастя, хворота. У Вшыткім говорити: Гей, Господи, вірю. А то і в сітуації, коли Боже є релатівізоване, высміване, неґоване, пронаслідоване. Коли зло наберать на силі. І втогды говорити: Вірю, Господи, же тым, котры люблять Бога, вшытко служыть на добро. Вірю, же Бог може вшытко обернути на наш хосен. А так най Хрістовы слова звучать часто в нашім сердці аіодповідайме на них так, як тоы сліпы з днешнього євангелія: Гей, Господи. Но одповідати на них не лем словом, але ділом нашого жывота. Ани ту не зістало лем при словах. Бо Ісус такой додав: Най буде так, як вірите. А они провиділи, бо їх віра была привдива, не была лем на словах, але доказали ділом. Слава Ісусу Хрісту!

В неділю, 04 авґуста 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 04 авґуста о 15.00 і 05 авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА