«Слово» – Закхейова неділя – неділя, 9.00 год.

Днешнє слово нам говорить о другій єріхоньскій події. Минувшу неділю сьме чули о чудеснім ділі, котре Ісус зробив, кедь выздравив сліпого чоловіка при дорозі. І тота подія ся розголосила по цілім місті.

А дочув ся о ній і єден чоловік, котрый жыв в Єрiхоні. Быв то Закхей. Быв мытарьом, а то і головным мытарьом і барз богатым чоловіком. Уж то, же быв мытарьом, котры выберали поплаткы про римску імперію. Были прислуговачами Рима, окрім того ся допущали і кривд. Бо то, што вызберали веце як мали одвести до римской касы, припало їм. І жыли роскошным і грішным жывотом. А Закхей быв начальником, головным мытарьом. То выкликало погорджаня аж ненависть ку ньому з боку жытелів Єріхона.

Тот Закхей, коли чув о Ісусови, в його сердці ся зродило желаня увидіти Ісуса. Но усвідомив собі, як жыє, а і то, же быв малого росту, як Його увидить? Но рішіня його было тверде, нич го не могло одрадити од того ціля – увидіти Ісуса. А так выліз на фіґовый стром. А коли Ісус ішов тов дорогов, заставив ся, посмотрив горі. Скорше як Його міг увидіти Закхей, Ісус його увидів і говорить йому: Подь долов, злізай зо строму, бо днесь мам быти в твоїм домі. Тоты слова врыли ся до сердця і наповнила го радость, і сходить з того строма а радостно го приїмать.

Но Закхей є наповненый радостьов, Ісус іде до його дому. Але з боку тых, котры ішли з Ісусом, было чути наріканя, высміваня, одсуджованя на адресу Ісуса. Тадь Він не знат ь, хто є Закхей? Якый то великый грішник. А тот, котрый говорить, є пророк, же є Хрістос, а Він не знать? Та днесь сме мы жытелі Єріхона одкрыли, же то є обдурьователь. Тадь Він не може быти Месія, Хрістос.

Ісус не реаґує на тоты слова, ани на думкы, бо Він видів і до сердець тых людей. Спокійно іде дому Закхея. А Закхей радостно Його прияв, а коли засмотрив ся на Ісуса говорить: Господи, я половину свойого маєтку роздам бідным, а кедь я дакому зробив шкоду, поверну штирираз веце. Што то стало ся? Нараз вшытко стихло. Уж не чути уста высмівачів, одсуджовачів, крітіковачів. Не чути уж слова в їх сердцях. Што то стало ся? Яка то зміна стала ся зо Закхейом? Вшыткы ся чудують.

Закхей посмотрив на Ісуса, а видів як в зеркадлі свій жывот. Видів вшытко зло, видиів кривды, видів бідных, сироты, вдовіці, котрых окрадав. Видів просячіх, як їх одганяв од свойого дому в часі, коли жыв роскошно і роспустно. Но видів і іншый образ, якый може быти. Якым ся може стати. Ісус йому указав два образы – його минувше з його гріхами, але і можность быти іншым. А Закхей выхосновав. Зато чує слова: Днесь пришло спасіня до того дому.

Ісус тото хоче робити і в нас. І нам говорить: Днесь мам быти в твоїм домі. Хочу вступити, жебы ті указати став твойой душы, але тыж яков ся може стати. Отвориме, приймеме Його з радостьов як Закхей, дозволиме Йому, жебы нам указав став нашой душы, і то яков може быти? Жебы сьме і мы так чули: Днесь пришло спасіня до той душы. Слава Ісусу Хрісту!

В неділю, 2. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. фебруара 2025 р. о 12.00 год. і 3. фебруара 2025 р. о 2.00 год. за русиньскым часом.