Сойм схвалил новелизацию уставы о меншынах

«Устава принята Соймом. Хотіл бы-м сердечні подякувати вшыткым участникам в рыхтуваню проєкту новелизациі, в леґісляцийным процесі, послам, комісиі Нацийональных і Етнічных Меншын – представникам меншын, урядовій страні, робітникам ґабінету маршалка і Пану Маршалкови» – написал Ришард Ґалля, полномічник Маршалка Сойму до справ меншын.

В четвер 10. липця/юлия 2025 р. Сойм принял новелизацию закону о нацийональных і етнічных меншынах, котра ґарантує, што Канцелярия Сойму буде забезпечала представникам меншын в Спільній Комісиі мериторичну і адміністрацийну обслугу.

За новелизацийом заголосувало 238 послів, проти было 16, а од голосу стримало ся 177. Устава трафит тепер до Сенату.

Попереднього дня, 9. липця/юлия 2025 р. посланкыня Моніка Роса справоздавала перед послами реченый проєкт уставы. Пояснила, што орґанізацийно-правна і мериторична обслуга меншыновой страны Спільной Комісиі Уряду та Нацийональных і Етнічных Меншын повинна быти покрывана з буджету державы, з середків в диспозициі Шефа Канцеляриі Сойму.

Розвязаня тото єст одповідю на постуляты роками зголошуваны представниками меншын о браку мериторично-орґанізацийного підпертя для іх діяня в Комісиі.

«Завдякы можливости барже успішной репрезентациі своіх інтересів будут [представникы меншын в Комісиі – прип. ред.] активнійшым партнером урядовой страны в дискусиі на тему потреб нацийональных і етнічных меншын в Польщы» – написала по выступліню на своім профіли на сіти Facebook посланкыня Моніка Роса з Парляментарного Клюбу Громадяньска Коаліция.

«Заґарантуваня мериторичного і орґанізацийного підпертя для спомненых підметів має тіж на ціли поправу якости публичной дебаты в сутьовых для меншын справах» – написала посланкыня.

Вчас дискусиі віцешеф Міністерства Внутрішніх Справ і Адміністрациі Томаш Шыманьскій підкрислил, што заложыньом проєкту новелизациі єст заґарантувати представником меншын, котры фунґуют в рамках Спільной Комісиі, правных можливости доступу до мериторичной і правной обслугы. «Міністер Внутрішніх Справ і Адміністрациі дає полне попертя для процедуваного проєкту уставы і рекомендує продолжаня робіт на тым етапі» – підкрислил.