Спільнота памяти – Ґорлиці, Руска Бурса

До подіі в Рускій Бурсі долучыли і выселены в 1947 р., котрых спомины были записаны во фільмі Аж і слезы не старчыли, м.ін. Димитрий Сабатович і Ярослав Трохановскій. Пришли і дальшы гості з Підкарпатской Руси – о. Димитрий Сидор, настоятель катедрального собору Христа Спасителя в Ужгороді довєдна з женом, та о. Константин, спілоснователь порталю Русиньска Бібліотека.

В тій части упамятнінь проповід на тему: Культуровы наслідства Акциі Вісла для Лемків дала проф. Олена Дуць-Файфер з Ягайлоньского Університету. Потім проходила артистична част, в котрій выступил хор Роса з Устя Руского, якым дириґувала Анна Дубец-Дильонґ, а окрем того лемківску поезию про выселіня авторства Івана Русенка, Павла Стефановского, Штефаніі Трохановской, Володислава Ґрабана і Меляніі Собин рецитували Ксандра Косовска, Дария Кузяк зо Заходу, Югаска Ґалчык, Фома Болех і Анна Шмайда з Лемковины та Моніка Тылявска і Севериян Косовскій – члены Руской Бурсы. По артистичній части авторы фільму Мария Сільвестрі і Джон Ріґетті оповідали о роботі над своім твором і дякували тым, котры причынили ся до фільмового запису найбарже траґічных подій русиньской істориі ХХ ст. на обшыри Польщы. Творці запросили тіж на премєрову емісию образу Аж і слезы не старчыли/ Even tears were not enough. 

Наконец, зобраны могли зісти вечерю і долго вести бесіды на тему подій прикликаных вчас пятницьовых упамятнінь Акциі Вісла на Лемковині.