Стариньского «Світ під Кычером» нагородженый в ліґницкым плебісциті

Лем што закінчыла ся тогорічна едиция Медженародного Фольклорного Фестівалю «Світ під Кычером». Його думкодавця – Юрий Стариньскій, выдал публикацию під такым самым наголовком. Оповідат она як раз о істориі орґанізуваного Лемківскым Ансамбльом Пісні і Танця «Кычера» фестівалю.

Книжка была перед парома днями оцінена в плебісциті Ліґницка Книжка Рока 2020. Конкурсова капітула спосеред 34 наголовків выданых минулого рока выбрала 5, в тым публикацию «Світ під Кычером».

Оповідат она о істориі фестівалю «Світ під Кычером», якій єст орґанізуваный од 1991 р. Є то монументальне выданя, якє чыслит близко 500 стран. Містит оно і 900 фотоґрафій такой зо вшыткых едиций фестівалю. Знимкы тоты походят од ріжных авторів, но дуже з них походит од двох фотоґрафіків, якы долгы рокы знимают фестівальове жытя – Рафала Выцішкєвича і Петра Кузяка.

Публикация явила ся в невеликым тиражы – 400 примірників. Не єст прото до сводібного придбаня, а радше буде находила ся в ріжных бібліотеках і інституциях. Перед парома днями єден примірник трафил і до Бібліотекы Руской Бурсы в Ґорлицях.

Цілю конкурсу Ліґницка Книжка Рока єст нагородити та промувати книжкы звязаны з Ліґницьом, написаны жытелями Ліґниці або выданы в тым місті. При выборі номінаций капітула смотрит м.ін. на ґрафічну страну, тему, ориґінальніст ци тото, як дана публикация влинула на жытелів міста, реґіону ци державы. Конкурс орґанізуваный єст Музейом Міди в Ліґници та Ліґницком Публичном Бібліотеком.