Стипендиі для здібной лемківской молодежы. Можеш старати ся і Ты!

Товариство для Розвитку Музею Лемківской Культуры оголосило набір кандидатів до стипендий Лемківского Стипендийного Фонду ім. Івана Русенка. Жебы старати ся о таку стипендию, треба м.ін. быти тогорічным матуристом. Стипендия выносит 700 зл місячні през цілый першый рік студиюваня.

Кєд серед Вас сут тогорічны матуристы, котры не лем успішні зарахували іспыты на конец середньой школы, але і нашли ся на списку принятых на студиі єдной з публичных высшых шкіл в Польщы (полный список учелен найдете гев) – університетів, політехнік ітп., то можут прібувати достати річну стипендию, котра поможе покрыти част выдатків звязаных зо студиюваньом.

Цілю Лемківского Стипендийного Фонду ім. Івана Русенка є фінансово підперти здібных Лемків і пропаґувати доробок Івана Русенка серед лемківской молодежы.

О стипендию Лемківского Стипендийного Фонду можут старати ся особы, котры выріжняют ся высокым результатом матурального іспыту, находят ся в материяльній ситуациі, котра вымагат фінансовой підпоры, а іх постійне місце замешканя то село або місто до 20 тис. жытелів на обшыри малопольского або підкарпатского воєвідств. Абсольвентам треба ся тіж ідентифікувати зо спадковином лемківского народа.

Додатково пунктуваны будут особы, котры брали або берут активну участ в діянях для лемківской соспільности ци локального середовиска. Альґоритм нарахуваня пунктів найдете за тым мотузком.

Комплет документів треба зложыти до 9. серпня/авґуста на адрес зындранівского музею. Оголошыня результатів набору заплянуване є на 12. серпня/авґуста.

Детальны інформациі про вшыткы вымогы і потрібны до зложыня документы найдете на сайті zyndranowa.org.