Страсти Христовы в креницкій церкви (фот. Петро Басалыґа)

По періоді Великого Посту, християне, хоснуючы юлияньскій календар, вошли в Страстний Тыжден, котрого друга половина прикликує подіі послідніх годин земного жытя Ісуса Христа перед Воскресіньом.

В Великій Четвер Церков припоминат Тайну Вечерю і встановліня Ісусом Христом таінства Евхаристиі. Вечером служыт ся утреня Великой Пятниці – богослужыня, вчас котрого чытаных єст 12 фраґментів вшыткых штырьох євангелий, приводячых жытя Христа од пращальной бесіды з учениками, через Розпятя, аж по зложыня тіла Спасителя до гробу.

Четвергова утреня єст вступом до богослужынь Великой Пятниці, коли приводжена єст памят крестной смерти Ісуса Христа і зложыня Го до гробу. В тот ден (окрем деякых вынятків – напр. коли дата Великой Пятниці зыйде ся з Благовіщыньом Божой Матери), не правлена єст Служба Божа, чым підкрислена єст жертва Спасителя і Його смерт на кресті. Вчас Великой Вечерні выношена єст плащаниця з видом Христа, зложеного до гробу, котра положена єст на середині храму.

Першу вістку о Христовым Воскресіню вірны почуют уж в Велику Суботу на Службі Божій, зачынаючій ся з вечерні, коли священник, знимаючы темны, пістны ризы, а облікаючы перед євангельскым чытаньом світлы, приводит 28. главу Євангелиі св. Матфія, в котрій Мария Магдалина враз з другом Марийом приходят ґу гробови Спасителя. Не нашовшы Го там, увиділи Ангела Господнього, котрий возвістил ім о Воскресіню Ісуса Христа.

В ночы з суботы на неділю, вчас Великодньой Утрені в церквах цілого світа вызвучыт славний пасхальний тропар «Христос воскресе із мертвых, смертію смерть поправ, і сущым во гробіх жывот даровав», котрий буде співаний до праздника Вознесенія Христового.

Долов: Вчерашня (28.04.2016) утреня Великой Пятниці в православній церкви св. Владиміра Великого в Креници. Фото: Петро Басалыґа.