Стріча з чловеком, котрий назвал горы…

20. мая т.р. о год. 19.00 в Рыманові одбуде ся стріча з Войцєхом Крукаром пн. На слідах колишніх Бєщадів та Низкого Бескіду.

Войцєх Крукар – доктор наук з обшыри ґеоґрафіі, бескідскій та бєщадскій провідник, член ПТКТ (Польского Туристычно-Крайознавчого Товариства), одзначений Міністром Культуры і Народового Дідицтва выріжніньом Заслужений Діяч Культуры.

Єст автором і редактором вельох туристычно-топомастычных мап, туристычных путівників, парудесятьох дописів з обшыри туристыкы, крайознавства, картоґрафіі та ґеоґрафіі. Од парунадцетьох років веде соспільну документацию-реконструкцию традицийного теренового назывництва Бєщадів і Низкого Бескіду.

Завдякы його тытанічній і барз сумлінній роботі, повело ся одтворити аж 8 тисячів назв. Горы, верхы, лісы, потокы, поля – одзыскали своі ориґінальны назвы. Част назв уж была, але напр. міцно переіначена, бо коли Австриякы робили в другій половині ХІХ ст. мапы цілой Ґаліциі, не докінця правильні записували звычайовы назвы од місцевых люди. Часто – нич не поміщали. Пак, мапы схоснувал як взір Войсковий Ґеоґрафічний Інститут, і хоц мапы до тепер становлят безконкуренцийний взір під ґрафічным взглядом, то не было на тілько часу, жебы провірити докладні назывництво. Переписано іх з австрийскых мап, на жаль – зас з блудами.

Войцєх Крукар схоснувал остатній момент, жебы тоты назвы одтворити. Своі досліджыня зачал іщы в 1989 році. Преіздил піл Польшы, жебы найти давных мешканців выселеных сел і при іх помочы привернути місцям іх ориґінальны назвы. На 157 сел медже долинами вышньой Віслокы і вышнього Сану, до 100 сел не нашол ниякого інформатора. З більшости сел остали лем дикы загороды і поля, а в примірі інчых не повело му ся дотерти до передвоєннх мешканців.

На новы мапы Бєщадів і Низкого Бескіду вписал 8 тисячы назв, скорше было іх лем тисяч.

Выбраны публикациі В. Крукара то:

• Okolice Komańczy Mapa turystyczno-nazewnicza ze słownikiem eynologicznym nazw terenowych,
• Okolice Rymanowa Zdroju mapa turystyczno-nazewnicza,
• Wola Michowa i Dolina Górnej Osławy w Bieszczadach,
• Okolice Komańczy i Woli Michowej. Pogranicze Beskidu Niskiego i Bieszczadów,
• Ustrzyki Górne i okolice. Mapa turystyczno-nazewnicza,
• Dukla i okolice. Beskid Niski – część środkowa.

A за тым мотузком найдете обшырний допис В. Крукара про тереновы назвы Західніх Бєщадів і Низкого Бескіду.