Студенты з Польщы познали русиньску меншыну в Сербіі

Студенты з Ягайлоньского Університету разом з др. габ. Томашом Квоком, в днах од 8. до 17. мая перебывали на студийній візиті в Войводині. В Новым Саді і Рускым Керестурі ближе познали м.ін. функцийонуваня русиньскых інституций і орґанізаций.

Студенты славяньскых філолоґій – сербского і хорватского языків, Ягайлоньского Університету были на парудньовым выізді в Сербіі в рамках проєкту «Войводина, мозаіка языків і культур».

Студенты одвиділи м.ін. Матицю Сербску, Інститут Культуры Войводиньскых Русинів та Пресово-Выдавничый Інститут «Рускє Слово». Гостили і на Філософічным Выділі Університету в Новым Саді, взяли участ в стрічы в Рускым Культурным Центрі.

Інститут Культуры Войводиньскых Русинів репрезентувал на стрічы директор той інституциі Саша Сабадош, присутна была тіж директорка Інституту Культуры Войводиньскых Словаків Ана Спевакова. Оповідли они о способі функцийонуваня меншын в Войводині і в Сербіі, як тіж о формах охороны і розвитку культуры меншыновых соспільности, якы реализуваны сут тыма інституциями на професийным рівни.

В Пресово-Выдавничым Інституті «Рускє Слово» присутных привитал його директор – др Борис Варґа. Студенты познали коротку історию інституциі та формы діяльности выдавництва, сут то м.ін. Пресова Аґенция Ruthenpress зо штоденным інформацийным сервісом, Документацийный Центр, якого задачом єст архівізация і творіня діґітального архіву публикаций і – предовшыткым – печатаня тыжденника «Рускє Слово». Окрем выміненых Інстутит печатат іщы часописы: «Рускій християньскій календар», «Заградка» – для діти, квартальник «Шветлосц» ци молодіжный часопис «МАК». Присутны на стрічы члены редакциі «Руского Слова» оповіли о своій штоденній роботі і способі рыхтуваня материялів в языку меншыны.

Проґрам студийной візиты, яку заплянувал і зорґанізувал др габ. Томаш Квока, обнимал докладне познаня ріжных аспектів і елементів реализациі прав меншын в Сербіі. Студенты шырше обышли Бачку – одвиділи м.ін. Суботицю, Сомбор, Остоічево, Бач, Рускій Керестур, Бачскій Петровац, Бездан і Челарево. Окрем Бачкы, одвиділи тіж Фрушку Гору в Сремі та Ковачіцу і Панчево в Банаті.

Были тіж в Бельграді, де бесідували з представниками польской амбасады і Польского Інституту.

фот: В. Вуячич, за: www.ruskeslovo.com