Сучасны іконы в Музею Никыфора в Креници

«I Слово стало тілом» – то тема ХІІ Медженародных Варштатів Іконописців в Новици. Ефекты тогорічной едициі подіі презентуваны сут од суботы, 19. вересня/септембра, в Музею Никыфора в Креници.

Вернісаж одкрыл о. Йоан Піпка, парох грекокатолицкой креницкой парохіі. Подія была о тілько нетипова, што з причыны санітарного режіму отвертя выставы проходило перед будинком Музею Никыфора. Темом тогорічной едициі пленеру писаня ікон в Новици было «I Слово стало тілом».

Медженародны варштаты писаня ікон орґанізуваны сут в лемківскій Новици уж од 2008 рока. Село, якє находит ся в долині, котра є релятивні міцно одтята од решты поблизкых місцевости, дозвалят в тишы зосередити ся на писаню ікон і подумати о тым, што є важне. Участникы вельо ся молят, роздумуют, бесідуют.

В варштатах берут участ артисты в Польщы, Украіны ци Білоруси, якы презентуют не лем традициі Східньой Церкви, але і Західнього Костела. Тото, што є східнє, то спільна ціль, яком є одновліня іконы як літургічного образу. Варштаты ведены сут в Домі Ікон в Новици, якым заряджат Братство Грекокатолицкой Молодежы Сарепта.

Варштаты презначены сут для початкуючых, як і заавансуваных в професиі писаня ікон. Присутны гын мают нагоду познати секреты історичной технікы яєчной темперы і позолочаня. Занятя ведут вправлены артисты з Польщы і Украіны.

Попленерову выставу в Музею Никыфора мож обзерати до 22. листопада/новембра.

Фот. Фб-профіль Медженародных Варштатів Писаня Ікон в Новици