Сумар дня 14. марця 2023 р.

Приносиме вам сумар медияльной ґрупы ЛЕМ.фм+ на ден 14. марця 2023 р.

«Охорона памятників Малопольщы»

Кінцьом лютого/фебруара Соймик Малопольского Воєвідства оголосил результаты тогорічной едициі конкурсу «Охорона памятників Малопольщы». Цілю конкурсу єст фінансова підпора при консерваторскых або ремонтовых роботах вынятковых обєктів з цілого воєвідства. До конкурсовой капітулы зложено понад 200 внесків, з чого 92 отримали фінансову підпору. Серед выріжненых нашли ся тіж задачы реализуваны на Лемковині. 40 тис. зл отримала грекокатолицка парохія в Розділю на консервацию розпису в церкви Народжыня Пресвятой Богородиці, а 30 тис. зл дофінансуваня допоможе провести консервацию двох ікон в церкви в Волівци. На списку выріжненых нашли ся тіж грекокатолицкы церкви м.ін. в Верхомли Великій, Жеґєстові ци Матієвій.

Потяг з центра Ліґниці до Економічной Стрефы уж курсує

Од 12. марця в розкладі ізды Нижньошлезской Желізниці явил ся новый пристанок – Ліґницка Стрефа. О такым розвязаню для подорожуючых з центра міста до Ліґницкой Специяльной Економічной Стрефы бесідували уж од давна. Інвестицию зреализували в рамках «Урядового Проґраму будовы та модернізациі желізницьовых пристанків». Подорож з головного дворця до стрефы занимят 11 минут, а по дорозі потяг затримує ся іщы на пристанку Пєкары. В робочы дни на трасі буде курсувало 11 пар потягів в обі страны. Розклад ізды єст так придуманый, жебы працівникы зо стрефы могли спокіні доіхати на кажду зо змін, а пак вернути дохыж. Новый розклад ізды доступный єст на сайті Нижньошлезской Желізниці.

Лемківско-Погіряньскій Великодній Ярмак

Припоминаме, што в неділю 26. марця в Мазярскій Загороді в Лоси пройде Лемківско-Погіряньскій Великодній Ярмак, орґанізуваный Музейом Дворы Карвациянів і Ґладышів. Головном атракцийом ярмаку буде презентация выробів ремісників і народных творців та можливіст купити розмаіты товары. В проґрамі подіі находят ся м.ін. великодні варштаты і презентациі, в тым лемківскых яєц ци погіряньской пальмы. Не бракне тіж традицийных забав звязаных з Великодньом. Подія закінчыт ся концертом хору Cantore Carvatiani в церкви в Лоси. Полный проґрам подіі находит ся на сайті музею. Вступ на ярмак то символична злотівка.

Черговы номеры «Маґуры» і «Карпатского Соспільно-Культурального Перегляду»

Вышол черговый номер часопису «Карпатскій Соспільно-Культуральный Перегляд». В публикациі мож чытати м.ін. статю о карпатскій архітектурі, допис пн. «Істория і ріжнорідніст рослин в Бєщадах» ци бесіду з етноґрафом др. Тадеушом Баранюком на тему Бойківщыны. В новым чыслі «Карпатского Соспільно-Культурального Перегляду» поміщена є і статя др Мирославы Копыстяньской о штоденным жытю Лемків. Часопис єст доступный на сайті procarpathia.pl. Вышла і нова «Маґура». Прочытате в ній м.ін. про туристику в парку, новы атракциі, спортовы подіі, ци про маґурскы лісы і птахы, котры мож обсервувати в зимовым періоді в Низкым Бескіді. На послідній страні «Маґуры» находит ся забава для діти і дорослых з неочывидным розвязаньом. Часопис доступный єст на офіцияльным сайті Маґурского Нацийонального Парку. Мож тіж придбати друкувану «Маґуру», напримір в сідибі Парку в Крампній.