Сумар дня 23. марця 2023 р.

Приносиме вам сумар медияльной ґрупы ЛЕМ.фм+ на ден 23. марця 2023 р.

Дві подіі на Пряшівскым Університеті

16. марця в просторах Пряшівского Університету проходили дві русиньскы подіі. Наперед одбыла ся членьска громада Сполку Русиньскых Писателів Словациі, пак проходил 56. Семінар Карпаторусиністикы. Лекцию пн. «Коміка стереотипів у прозі Мирослава Жолобанича» приготовил фаховый асистент Інституту Русиньского Языка і Культуры Михал Павлич, котрый занимат ся русиньском літературом. Орґанізаторы семінара тот раз вырішыли закликати на подію і студентів середніх шкіл, котры проявили заінтересуваня сучасном русиньском літературом. На подію приняли запрошыня і русиньскы авторы – Мария Шмайдова, Миколай Коневал, Мілян Ґай і Мирослав Жолобанич. Позад дискусиі докторантка русиньского інституту Михала Голубкова представила найновшы выданя з обшыри карпаторусиністикы за послідні три рокы.

В найблизшу суботу зыйдут ся ґорлицкы бурсакы

В найблизшу суботу, 25. марця, одбуде ся загальне зобраня членів Стоваришыня Руска Бурса в Ґорлицях. Згідно зо статутом Стоваришыня, загальны зобраня одбывают ся раз на рік. Одобраный буде справопис з діяльности заряду за 2022 р. і выбраны власти на нову річну каденцию. Загальне засіданя членів то все добра нагода, жеби вести бесіды на тему дальшой діяльности орґанізациі і єй пріоритетів на будуче. В тот сам ден заплянувана єст тіж технічно-орґанізацийна стріча членів редакциі радия і порталю ЛЕМ.фм.

Гарді-Ковачевич одзначена за ціложывотне діло

Вчас зобраня Общества Писателів Войводины, котре одбыло ся 18. марця в Новым Саді, была вручена русиньскій писательці Іріні Гарді-Ковачевич Нагорода за ціложывотне діло, за літературный опус. За словами лавреаткы преміі, нагороду принимат як оцініня русиньской літературы, котра є частю войводиньской літературы. Стрічу одкрыл председа Общества Йован Зівляк, котрый припомнул, же з причыны пандеміі два рокы стріча не одбыла ся. Нагороду за ціложывотне діло перед Іріном Гарді-Ковачевич з русиньскых писателів остатній раз здобыл Дюра Папгаргаі (1936-2008), а то іщы в 2001 р. Гарді-Ковачевич походит з Руского Керестура. Любов до літературы привела єй до редакциі ґазеты Рускє слово. В тым часі зачала ся і єй літературна творчіст (шырша публика знає єй головно як поетесу). В 2016 р. здобыла Премію Мирослава Стрібера за приповідкову книжку Нєбо над Керестуром.

Мадярска президентка стрітила ся з сирийскыма владыками. Участ брал і митрополита Филип

Як інформувал сайт Ніредьгазской Грекокатолицкой Єпархіі, грекокатолицка Церков на Мадярах, як і мадярскы власти утримуют постійны односины з християньскыма церквами в Сириі. Потверджыньом того было і принятя предстоятелів сирийскых церкви, патріархів Антіохіі, вєдно з Высокопреосвященным владыком Филипом Кочішом, гайдудорожскым архієпископом і митрополитом Мадяр, президентком Каталін Новак. Мадярска президентка стрітила ся з представниками церкви в пятницю, 17. марця в своій приватній резиденциі. В стрічы окрем митрополити Филипа брали участ Йоан X, грецкій православный патріарха Антіохіі і цілого Сходу, владыка Юссеф Абсі, мелькітскій грекокатолицкій патріарха Антіохіі і цілого Сходу, Єрусалима і Александриі та Ігнат Єфрем II, сирийскій православный патріарха. Голова державы запевнила сирийскій і турецкій народы о своім сочувстві в повязаню з остатньом катастрофом землетрясіня. Представникы Антіохіі высловили вдячніст, же Мадяры і грекокатолицка митрополия на Мадярах реґулярно морально і фінансово помагают.