Сумар дня на 1. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 1. грудня/децембра 2025 р.

Ден Русинів Польщы

В тым тыжни будеме святкувати Ден Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці з 1918 році, якє пак дало початок Рускій Народній Республиці Лемків. В тым році центральны святкуваня Дня Русинів Польщы одбудут ся в суботу 6. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці о год. 14.30 в долинці при грекокатолицкій церкви. Дальше, як каждого рока, споминовы подіі будут проходити в Рускій Бурсі в Ґорлицях. Торжество в Рускій Бурсі зачне ся о 16.00 год. В рамках музичного проґраму выступлят ансамбль Терочка та Юлия Дошна і Івона Іскра Криницка. Просиме до спільного святкуваня!

Ден Копальників в православній парохіі в Любіні

Ближыт ся найважнійше свято для копальників – тзв. Барбурка. В календари є то 4. грудня/децембра, коли приводит ся памят о Святій Варварі, покровительці копальників. З той нагоды Нижньошлезскє Копальниче Братство просит до участи в торжествах, якы пройдут в православній парохіі св. Тройці в Любіні. Святкуваня будут проходити в найблизшый четвер 4. грудня/децембра од год. 8.30. Зачнут ся од Св. Літургіі правленой в інтенциі копальників і іх родин. Богослужыня з нагоды Дня Копальників правлене єст в православній парохіі св. Тройці в Любіні каждого рока. Святкуваня обняло своім патронатом KGHM Польска Мідь.

ЗІРС святкує свій ювілей выданьом новой книгы о Підкарпатскій Руси

Здружыня Інтеліґенциі Русинів Словациі святукє 30 років од свого основаня. Стоіт оно за многыма книгами, збірниками, лекциями, освітом в школах, документацийом, нагрываньом устной істориі, документальныма фільмами і дальшыма проєктами. При нагоді свого ювілею орґанізация приходит з новом публикацийом, заміряном на історию Підкарпатской Руси меджевоєнного періоду, коли была в складі Чехословацкой Республикы. Іде о публикацию пн. «Буд світло! Безпека – корупция – інтересы в енерґетиці Підкарпатской Руси в роках 1919-1945», якой автором єст Давід Губеный. Веце о публикациі прочытате в дописі на нашым портали.

Тырват процедура выбору выконавці перебудовы желізничного дворця в Креници

В минулым місяци ґміна Крениця одкрыла конкурс оферт на перебудову желізничного дворця в Креници. До конкурсу было зголошеных 16 оферт. Як поінформувал бургомайстер Крнеиці Пьотр Рыба, аж три оферты містят ся в квоті низшій як 15 млн злотых. То добры інформациі для самоуряду, в котрого буджеті єст уж на тоту ціль понад 12,5 млн злотых з дофінансувань. Тырват процедура выбору выконавці. Припомнийме, што самоуряд має уж так проєкт перебудовы, як і фінальне позволіня на будову. Будинок перейде полну модернізацию і частично змінит своє перезначыня. Цілю інвестициі єст не лем ратуваня забыткового дворця перед поступуючом деґрадацийом, але і створіня цілорічного простору, котрый позволит на орґанізацию вшелеякых артистичных подій. Мал бы там быти одкрытый і музей, вказуючый історию курорту і люди, котры го спілтворили. Част поміщынь буде пристосувана до потреб пасажерів желізниці. Кєд вшытко піде згідні з пляном, модернізация дворця повинна ся завершыти до кінця вересня/септембра 2027 рока.