Сумар дня на 1. квітня 2026 р.

Приносиме вам сумар медияльной ґрупы ЛЕМ.фм+ на ден 1. квітня 2026 р.

Анкєтове баданя проєкту FOSTERLANG

Просиме до участи в загальнопольскій анкєті, котра посвячена єст хоснуваню меншыновых і міґрантсткых языків в Польщы. Баданя реализуване єст в рамках европейского проєкту FOSTERLANG, фінансуваного Европском Комісийом. Проєкт єст веденый, жебы здіаґнозувати выкликы, з якыма міряют ся хоснувателі тых языків, і створити розвязаня, якы підперают іх охорону і розвиток. Орґанізаторы заохочуют, жебы ділити ся своіма опініями, знаньом і досвідчыньом. Участ в баданю єст анонімова, анкєта доступна єст онляйн. Мотузок подаєме на портали лем.фм в закладці Сумар дня при днешніх новинах: анкєта. Анкєта єст тіж доступна на вебсайті проєкту: fosterlang.al.uw.edu.pl.

Як розвивати лемківскій язык? Вчыня, материялы і інспірациі – презентация дослідників

В рамках спомненого проєкту – FOSTERLANG, о два тыжні на Лемковину приде ґрупа дослідників з Варшавского Університету і Університету Адама Міцкєвича в Познані. В пятницю 17. квітня/апріля о 17.00 год. вкажут в Рускій Бурсі в Ґорлицях презентацию на тему можливых метод вчыня лемківского языка і материялів, котры можут розвивати лемківскы языковы ресурсы поза школом – тема доповіди то: Як розвивати лемківскій язык? Вчыня, материялы і інспірациі. Окрем выголошыня прелекциі ґрупа дослідників хоче головні побесідувати з учытелями лемківского языка, а тіж з родичами, якы посылают (або ніт) діти на занятя з того предмету. Каждый, хто лем хоче і має хвилю часу стрітити ся з бадачами, єст сердечні прошеный – дослідникы будут доступны цілый четвер, пятницю і суботу. Можут підіхати де треба або стрітити ся в Бурсі. Заінтересуваных просиме о контакт на майльовый адрес нашого стоваришыня: sekretariat@ruskabursa.org.

Розвиток желізниці в підкарпатскым воєвідстві

Тырвают великы желізничны інвестициі в напрямі Бєщадів. Модернізувана єст штрека, будуют новы затриманкы, має скоротити ся час переізду. Як подают Польскы Желізничны Леніі, то єдна з найвешкых модернізаций желізничной інфраструктуры в тій части державы од вельох років. На леніі но 107, з Нового Загіря до Лупкова, выремонтували інжынєрийны обєкты, переізды і штреку. Вартіст тых робіт то 11 млн зл. Іщы векшы інвестициі ведены сут при леніі но 108, м.ін. на одтинках од Ясла через Біч, Коросно по Нове Загіря. Вартіст робіт на тій трасі перебільшыла уж 60 млн зл. Єдным з важнійшых ефектів модернізациі має быти скорочыня часу переізду з Ряшова до Нового Загіря о 25 минут. Модернізация дозволила одновити рух потягів м.ін. до Угерців і дале в страну Устрик і переходу в Коростенку. Інвестициі мают поправити не лем скоріст, але тіж комфорт подорожы, безпеку та комунікацийну доступніст реґіону. Модернізация желізничной леніі в підкарпатскым воєвідстві то процес розложеный на рокы, але уж видно першы ефекты.

Стріча з Югаском Спяк, промітаня фільму і выклад др. габ. Томаша Квокы

В другій части квітня/апріля одбудут ся дальшы подіі, якы товаришат выставі «Формы присутности. Штука Карпатскых Русинів» презентуваній в Етноґрафічным Музею в Варшаві. В неділю 26. квітня пройде стріча з Югаском Спяк, авторком єдной з робіт, што находит ся на выставі, стріча буде получена з творчыма варштатами. Того самого дня одбуде ся іщы презентация фільму «Енді Варголь. Американьскій сон». То документ о жытю і творчости артисты в режысериі Любомира Сливкы. По сеансі одбуде ся дискусия з Михалом Шымко і Лукашом Адамскым. А в віторок 28. квітня др габ. Томаш Квока приближыт заінтересуваным історию войводиньскых Русинів, іх міґрацию до Паноніі і тото, як столітями, далеко од карпатской вітчызны, плекали свою достоменніст.