Сумар дня на 1. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 1. серпня/авґуста 2025 р.

Ближыт ся 45. Лемківска Ватра на Чужыні

Уж о тыжден, в пятницю 8. серпня/авґуста в Михалові на Нижнім Шлезску зачне ся ювілейна 45. Лемківска Ватра на Чужыні. Першого дня на сцені запрезентуют ся Ластівочка з Пшемкова, Зоря з Устя Руского, Студенка з Калуша (Украіна), Серенча з Ґорлиц, Дуляровы Братя з Ґорлиц і Інтраде. В суботу на сцені запрезентуют ся Кычерка з Ліґниці, Ластівчата з Пшемкова, польскій ансамбль Малы Ґожовякы, якій вказує і лемківскій фольклор, Студенка з Калуша, Тераборсук з Пряшова та Кычера з Ліґниці. В суботній вечер ансамбль Ластівочка запрезентує пєсу «Дружбівскій Вечер». Забаву заграют два лемківскы ансамблі – Троянда і Водограй. В тым році, окрeм концертiв, варштатів i спільнотового святкуваня, орґанізаторы – Стоваришыня Лемків, зас зрыхтували Зону Дискусий i Выміны Поглядів, то є одкрыту простiр до бесід о лемкiвскій достоменности, істориі, культурі і традициях. Вступне на ватру мож придбати уж тепер онляйн через сайт Стоваришыня Лемків, або в касі в ден Ватры – лем за готівку.

МНП пошырит ся о долину лемківской Незнайовой

Маґурскій Нацийональный Парк пошырит ся о долину Незнайовой. Фундация Orlen і Orlen Art&Science передала 3,5 млн злотых для Маґурского Нацийонального Парку на охорону дикой природы, а конкретно беркута, єдного з найрідше выступуючых орлів. Актуально в Польщы гніздує лем близко 30 пар того цінного ґатунку птаха. Завдякы отриманым середкам Маґурскій Парк выкупит 50 гектарів вынятково цінной природничо долины по неістнуючым уж лемківскым селі Незнайова в Низкым Бескіді, якє являт ся остатнім місцьом сохраніня беркута. За Маґурскым Нацийональным Парком, то першый крок для пошыріня границ парку і шанса сохранити єден з остатніх дикых краєвидів в Польщы. Закуп терену, де колиси находило ся лемківскє село Незнайова, мал бы помочы утримати высоку біоріжнорідніст долины, але і заховати елементы культурной спадковины – придорожны кресты, капличкы, цмонтір. Передана обшыр буде влучена в границі парку як остоя дикой природы в Карпатах.

Свято Лосяньскых Мазярів

Уж в найблизшу неділю 3. серпня/авґуста в Мазярскій Загороді в Лоси буде проходила чергова едиция Свята Лосяньскых Мазярів. В рамках подіі одбудут ся концерты, варштаты, показы ремесла, выставы і дальшы атракциі. Буде і показ лемківской традициі выпаляня дегтю. Процес запрезентує школяр дегтярства, Томаш Дошна, якій приближыт техніку выпаляня дегтю і оповіст о значыню дегтю в давным жытю мекшанців реґіону. Лемкы хоснували дегеть в народній медицині, ремеслі, але і в штоденным жытю. Вчас выпаляня Томаш Дошна розповіст і о дегтярях і розмаітых віруванях звязаных з том загыбаючом професийом. Показ зачне ся о 13:00 год.

Варштаты в Рускій Бурсі в Ґорлицях

Припоминаме, што уж заран, в суботу 2. серпня/авґуста, в Рускій Бурсі в Ґорлицях, в само полудне одбудут ся варштаты для діти. Тым разом буде мож спірувати своіх сил в формуваню брельочків і завішок зо студеной плястичной масы з карпатскым прінтом. Орґанізатор забезпечат материялы. Вступне дармо.