Сумар дня на 1. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2025 р.

Ближыт ся праздник священномученика Максима

Уж в найблизшу пятницю зачнут ся торжества з нагоды дня памяти священномученика Максима Ґорлицкого. Головны святкуваня на Лемковині пройдут в православній катедральній церкви святой Тройці в Ґорлицях в днях 5.-6. вересня/септембра. В пятницю, в передден свята, о 17.00 год. буде служена Всеночна. В ден святя о 6.00 год. буде правлена ранішня Літургія, пак о год. 8.00 акафист перед мощами св. Максима. О год. 9.45 привитаны будут прибывшы владыкы, а о 10.00 пройде головна свята Літургія. В тым році черговый раз одбуде ся піше поломництво орґазнізуване Братством Православной Молодежы Перемышльско-Ґорлицкой Єпархіі, з благословліня архієпископа Паісия, владыкы перемышльско-ґорлицкого. VIII піше поломництво з рідного села Максима Сандовича – Ждыні, до Ґорлиц одбуде ся 5. вересня/септембра. Зачне ся о 5.00 год. рано в церкви Покровы Пресвятой Богородиці, в котрій был хрещеный св. Максим. Там буде служена Божеска Літургія. Пак поломникы підут через Ґладышів на Маґуру, до Маластова, Ропиці Руской, через Санкову і Сяры до Ґорлиц. Зголошыня мож іщы подавати до найблизшого четверга до Братства Православной Молодежы Перемышльско-Ґорлицкой Єпархіі. Празднувати ден памяти святого Максима будут тіж м.ін. нашы родакы в Зъєднаных Штатах Америкы.

Стрічы з Анджейом Жыґадлом в Музею Сучасной Штукы в Кракові

Од заране, в днях од 2. до 5. вересня/септембра в Музею Сучасной Штукы в Кракові MOCAK буде мож стрітити ся з Анджейом Жыґадлом – артистом молодого поколіня, якій постійні спілпрацує зо Стоваришыньом «Руска Бурса» в Ґорлицях. Стрічы пройдут в годинах од 16.00 до 18:00 в просторі його выставы під наголовком «Полня». Вказуваны сут на ней образы, якы односят ся до темы памяти, достоменности, цикличности жытя з двох малярскых циклів: «Храм» і «Церквиско». Джерелом інспіраций до намамлюваня образів єст терен днешнього польско-украіньского погранича, з котрого выводит ся автор, але найдеме тіж єден образ безпосередньо навязуючый до Лемковины – конкренто до Панкной. Векшіст образів осаджена єст в історичным контексті місц і подій. Артиста оповідат о минулости – образує тяжкы досвідчыня обшыри, котрых культура і спадковина были систематичні вымазуваны. Жыґадло має особливый спосіб компонуваня – інспірує ся архівальныма материялами з неістнуючыма днес церквами, але на полотно переносит лем пейзаж і люди. Выстава вказувана єст до кінця того тыжня в Музею Сучасной Штукы в Кракові.

Торжественне одкрытя музейных обєктів в Бортным по консервациі

О тыжден, в понедільок 8. вересня/септембра одбуде ся торжественне одкрытя музейных обєктів в Бортным, по завершыню консерваторскых прац зреализуваных в рамках задачы «Ратівничы працы консерваторского типу при забытковій грекокатолицкій церкви і плебаньскым шпіхліри в місцевости Бортне». Подія буде проходила од 16.00 год. в грекокатолицкій церкви святых Космы і Даміяна в Бортным. Церков в Бортным была вознесена в 1842 р. Репрезентує західній тип лемківского сакрального будівництва. Внутрі святыні находят ся бароковый іконостас і різбленый, поліхромуваный бічный олтар з XVIII столітя.