Сумар дня на 10. червця/юнія 2025 р.

Приносиме вам сумар медияльной ґрупы ЛЕМ.фм+ на ден 10. червця/юнія 2025 р.

Стріча представників меншын з Полномічником Малопольского Воєводы дс. Нацийональных і Етнічных Меншын

6. червця/юнія в Малопольскум Воєвідскым Уряді в Кракові проходила стріча з Полномічником Малопольского Воєводы дс. Нацийональных і Етнічных Меншын Томашом Оцеткєвичом з представниками меншыновых орґанізаций. Представил він вступны пляны будучой діяльности Полномічника Маршалка Сойму дс. Меншын Ришарда Ґаллі, а присутны члены соспільных орґанізаций зреферували діяльніст підметів, котры репрезентували. Участ в стрічы взяли представникы шестьох уставово узнаных меншын, в тым Стоваришыня «Руска Бурса» в Ґорлицях, репрезентуване ведучом Наталийом Малецком-Новак. Бесідувано м.ін. о новых ініциятивах Полномічника, такых як орґанізация студийных выіздів для діти і молодежы з меншын до Сойму, новелизациі Уставы о нацийональных і етнічных меншынах та о реґіональным языку і протидіяню языкови ненависти. Посліднім пунктом стірчы было выслуханя выступлінь каждого з присутных – представників меншыновых орґанізаций. Наталия Малецка-Новак оповіла о постійных проєктах орґанізациі, в тым двох особливо важных: о І етапі ремонту будинку Стоваришыня, на котрый фінансуваня повело ся позыскати з Міністерства Культуры і Нацийональной Спадковины в квоті 350 тис. зл. та реализациі дволітньой бадавчой задачы «Спільный краєвид» фінансуваной Нацийональным Інститутом Свободы.

Одкритя Медженародной Літньой Школы Русиньского Языка і Культуры

8. червця/юнія в Пряшові прошло торжественне одкрытя Studium Carpatho-Ruthenorum 2025 – Медженародной Літньой Школы Русиньского Языка і Культуры. То уж 13. річник той вынятковой русиньской літньой школы, котру як єдиный на світі орґанізує Пряшівскій Університет – Інститут Русиньского Языка і Культуры. Того рока одкрытя школы было повязане зо святкуваньом Дня Русинів Словациі, зато студенты і лекторы тогорічной едициі подіі зышлы ся в просторах Театру Йонаша Заборского. Участных юст 19 студентів з 10 держав. Занятя ведены сут по русиньскы і анґлицкы. В проґрамі находят ся курсы языка, істориі, літературы і етноґрафіі, але тіж занятя поза університетом, як напр. варштаты, звиджаня музеів ци місц історичні важных для Русинів. Літня Школа Русиньского Языка тырвала буде три тыжні і закінчыт ся 27. червця/юнія.

Фінансова підпора для Маґурского Нацийонального Парку

Маґурскій Нацийональный Парк на своім фейсбуковым профіли поінформувал, што в Ден Охороны Середовиска з фундациі ORLEN отримал 3,5 млн зл на охорону дикой природы. Переданы середкы будут перезначены на выкупліня 50 гектарів вынятково цінной долины в Низкым Бескіді, де колиси находило ся село Незнайова, а тепер єст то єдно з невельох місц, де прожыват беркут. То першый крок до побільшыня обшыри парку та можливіст сохраніня єдного з остатніх дикых краєвидів в Польщы.

«Час для Лопянкы»

Ґмінный Центр Культуры і Еколоґіі в Тисній та Карпатскє Товариство просят на 12. едицию інформацийно-прелекцийной стрічы «Час для Лопянкы». Подія пройде в суботу 14. червця/юнія в будинку Центра Культуры в Тисній. Стрічу одкрыє Станіслав Криціньскій в прелекциі «Шляхецкы Дворы Бєщадів». В проґрамі акциі находят ся іщы бесіды о модерній археолоґіі, представліня успіхів археолоґічных робіт в Лопянці і Лупкові та вказаня нематерияльной арехеолоґіі в піснях погранича. Стріча зачне ся о 10.00 год.