Сумар дня на 10. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 10. лютого/фебруара 2025 р.

Дальша перебудова дорогы з Мушыны до польско-словацкой границі

Дорога з Мушыны до польско-словацкой границі має быти барже комфортова. Ґміна зачынат проєкт, котрый позволит м.ін. на дальшу перебудову дорогы в сторону Лелюхова. Роботы будут ведены і по словацкій страні. Як поінформувал бургомайстер Мушыны Ян Ґольба, окрем пошыріня дорогы на терені самоуряду будут тіж выконаны забезпечыня зсувів ґрунту. Має тото значыня для поправы безпекы і предовшыткым выгідного доізду до границі на словацку сторону і назад, до часу аж буде выбудувана обводниця. В рамках інвестициі побудуваны будут штырі опоровы муры, котры забезпечат корону дорогы перед осуваньом ся в сторону Попраду. Скарпа буде забезпечена сітком. Дорога буде тіж пошырена. На выконаня робіт фірма, з котром самоуряд уж підписал умову, буде мала 9 місяців. Ремонтуваный фраґмент єст продолжыньом ремонтів ґмінной дорогы з попередніх років. На понад 2-кілометровым одтинку в трьох етапах вымінено уж верхню верству і забезпечено осувиска над дорогом та од стороны рікы Попрад. Кєд же проєкт єст реализуваный в рамках проґраму Interreg, дорога до границі буде змодернізувана і по словацкій страні. Іде о дорогу, котра была нарушена в часі залив. То 3-кілометровый одтинок зо села Злате близко Бардийова. В рамках прац буде перебудуваных 10 перепустів і міст над потоком Златяньскым. Інвестиция по словацкій страні отримала дофінансуваня в квоті понад мілийона 700 тис. евро, а по польскій страні понад 2 млн евро.

Буде комунікацийне получыня медже Польковицями і Хоцяновом

В минулым тыжни інформували сме, што власти Хоцянова выповіли ґміні Польковиці порозумліня, котре тыкат спільной орґанізациі ґрупового транспорту. Мало ся то вязати з анулюваньом дармовых переіздів медже Польковицями і Хоцяновом жолтыма автобусами леніі номер 23, 23А і 25 од 1. марця тр. Як поінформувал польковицкій повіт, комунікацийне получыня медже Хоцяновом і Польковицями буде. Польковицкє староство рішыло, што не лишыт жытелів без можливости доізду до школы, лікаря, уряду ци роботы. Підняли діяня тыкаючы перевозів і уж неодолга має быти выбраный оператор леніі. Дрібницьовы розклады ізды мают быти готовы до кінця того місяця. До 28. лютого/фебруара обовязує дотеперішній розклад ізды на реченых леніях 23, 23А і 25.

Іщы веце атракций на Парковій Горі в Креници

Уж неодолга на Парковій Горі в Креници будут доступны дальшы атракциі. То м.ін. водный пляц забав, скалодром та вельофункцийный будинок зо шкляным дахом, з котрого буде мож обзерати ляндшафты і напити ся кавы. Мают они быти одкрыты уж на тоту яр. Кошт побудуваня новых атракций то близко 7 млн злотых. То дополніня істнуючых там уж Загорід Сил Натуры. Працы при будові атракций практично ся завершыли, тырват уряджаня інтерєру. Інвестор, Польскы Кабельны Желізниці (PKL) рахує, што удоступніня цілой оферты заохотит одвиджати іщы векше чысло туристів і жытелів. Дотля на Парковій Горі в рамках Загорід Сил Натуры были одкрыты видокова плятформа, силовня під хмарком, спацеровы алейкы ци мініятуры найбарже характеристичных креницкых обєктів.