Сумар дня на 11. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 11. лютого/фебруара 2026 р.

Явил ся «Контекстуальный словник лемківского языка» під редакцийом проф. Олены Дуць-Файфер

На выдавничым рынку явила ся нова позиция, перша така в цілій істориі, што тыкат лемківского языка – є то двотомовый «Контекстуальный словник лемківского языка» під редакцийом проф. Олены Дуць-Файфер. То монументальна робота і ефект мурянчанoй працы цілого ансамблю осіб. Опрацуваных было 34 612 словниковых госел на базі 1892 позиций та простой бесіды. Томы рахуют одповідньо – 1150 і 1214 стран. Особы, якы працували при редаґуваню госел, то: Марта Ватраль, Варвара Дуць, Олена Дуць, Севериян Косовскій, Наталия Малецка-Новак, Павел Малецкій, Анна Масляна, Моніка Тылявска. Процес тот тырвал 5 років. Наступных 6 проходила редакторска, коректорска і едиторска робота. Шырокій вступ, наукoве опрацуваня і редакцию словниковых госел зробила проф. Олена Дуць-Файфер. Коректу зробили Марта Ватраль та Клавдия Новак, a лексикоґрафічну коректу Анна Чухта. Словник был печатаный в рамках сериі Scripta Lemkoviana в выдавництві Книгарня Академіцка і єст доступный до купліня на сайті того же (на разі в формі файля типу пдф, неодолга в выдрукуварній версиі). Першы печатаны примірникы мож видіти в бібліотеці Руской Бурсы.

«Потопа» з черговыма намінациями

Словацка Фільмова і Телевізийна Академія опубликувала номінациі до фільмовых нагорід Сонце в сіти за 2025 рік. Медже номінуваныма нашол ся першый по русиньскы граный фільм пн. «Потопа», котрый мож обзерати в кінах од грудня/децембра минулого рока. «Потопа» здобыла в сумі 9 номінаций в ріжных катеґориях, што вказує, же фільм был барз добрі принятый не лем серед русиньской публикы – а заінтересувал тіж фільмову критику та Словацку Фільмову і Телевізийну Академію. «Потопа» здобыла номінацию м.ін. з катеґориях: найліпшый граный фільм, найліпша режысерия, сценарий, звук, сценоґрафія, костюмы ци візувальны ефекты. Номінуваны были тіж акторы: Сара Хрипакова в катеґориі найліпшой головной жіночой акторкы та Володимир Чема, як найліпшый другорядный мужскій актор. Режысером фільму «Потопа» є Мартін Ґонда.

Три трансграничны проєкты ПСК

Крайскы посланці Пряшівского Самосправного Краю схвалили в понедільок 9. лютого/фебруара три трансграничны проєкты, якы будут реализуваны в рамках медженародной спілпрацы проґраму Interreg Next. Культурны інституциі, якы діют як інституциі ПСК будут реализувати проєкты разом з украіньскыма партнерами. Любовняньскій Музей – Град в Старій Любовни буде вюл дальшы модернізацийны і ремонтовы роботы на обєкті, будут тіж реализувати новы формы презентациі культурной спадковины. Крайска Ґалерия в Пряшові зреализує проєкт разом з Закарпатскым Областным Аритстичным Музейом ім. Йосифа Бокшая в Ужгороді, в рамках якого то проєкту м.ін. зроблят реконструкцию єдного з двох міщаньскых домів. Проєкт Выгорлятской Звіздарні в Гуменным тыкат ся моніторінґу занечыщыня світлом в Карпатах. Разом з партнером з украіньской страны куплят специяльный телескоп, котрым будут бадати і оціняти сесе занещычыня.

Одбыла ся ХІХ Загальнопольска Конференция Методичных Порадників і Візитаторів Вчыня Православной Реліґіі

5. лютого/фебруара в Центрі Православной Культуры св. Кірила і Методия в Варшаві одбыла ся ХІХ Загальнопольска Конференция Методичных Порадників і Візитаторів Вчыня Православной Реліґіі. Стріча была посвячена выміні досвідчыня і омовліню змін во вчыню реліґіі в школах і катехетичных пунктах, што выникнуло з рішынь Міністерства Нацийональной Едукациі. Конференцию попередил молебен, котрый правил о. митрат Юлиян Феленчак, візитатор вчыня православной реліґіі Перемышльско-Ґорлицкой Єпархіі. В засіданях взяло участ двадцетеро візитаторів і порадників зо вшыткых єпархій в Польщы. Модератором конференциі был директор православной митрополиі дс. вчыня реліґіі др Ян Зєнюк.