Сумар дня на 10. марця 2026 р.

Приносиме вам сумар медияльной ґрупы ЛЕМ.фм+ на ден 10. марця 2026 р.

Вмер професор Александр Дуличенко

6. марця в Тарту в Естоніi вмер вызначный лiнґвiста – проф. Александр Дуличенко. Мал 84 рокы. Дуличенко народил ся в 1941 р. в селi Высокій в Росиi. Званя професора здобил на Унiверситетi в Тарту i тiж там рiшыл ся жыти. Свою наукову карєру Дуличенко зачал од дослiджаня языка бачваньскых Русинів, в часах, коли в інчых комуністичных державах Русинів офіцийнi не было. Был автором вельох публикаций посвяченых языкам Карпатскых Русинiв, але не лем, бо занимал ся лiнґвiстиком в рiжных єй обшырях. Його найважнiйшым науковым осягнiньом была книжка «Письменность и литературные языки Карпатской Руси. XV–XX вв.», в котрiй пiднял пробу iлюструвати практичнi цiлу iсторию писменництва Русинiв. Был тiж членом м.iн. Медженародного Комiтету Славiстiв i Нюйорской Академіi Наук. Його вклад в карпаторусиністику на все буде записаный до русиньской істориі. Вічна памят!

Засіданя Світовой Рады Русинів

В суботу 7. марця в просторах філолоґічного выдiлу Університету в Орадi в Румуніi одбыло ся третє засіданя Світовой Рады Русинів – выконавчого орґану Світового Конґресу Русинів в меджеконґресовым періоді. В рамках публичной части засіданя Світовой Рады Русинів одбыла ся презентация книжкы Франціска Оскара Ґала пн. «Русиньска апокаліпса». В часi непубличного засіданя члены Рады бесiдували о рыхтуванiй публикациi, котра буде посвячена 35. річници основаня Світового Конґресу Русинів, што одбыло ся в 1991 р. в Меджелабірцях. Окрем того, репрезентанты членскых орґанізаций СРР представляли пляны працы своіх орґанізаций на сес рiк. При тым, до половины квiтня/апрiля мают передати пропозициi кандидатiв на Премію Василя Турока-Гетеша і на Нацийональну Премію імени Івана Манайла Pro Arte Ruthenorum за 2026. р. В тым самым часi одбыло ся тiж 5. засіданя Світовой Рады Світового Форуму Русиньской Молодежы.

Промоция «Контекстуального словника лемківского языка»

20. марця на Ягайлоньскым Університеті, в Collegium Maius одбуде ся офiцийна промоция «Контекстуального словника лемківского языка». О 15.00 год. зачне ся стріча з редакторком словника проф. Оленом Дуць-Файфер і членами словникового ансамблю, якы м.ін. опрацовували словниковы госла. В дискусиі участ возмут тіж языкознавцi – проф. Мацєй Рак і проф. Генрик Фонтаньскій, якiй разом з Мирославом Хомяк є автором «Ґраматикы лемківского языка». В рамках проґраму промоциі одбуде ся выступ ансамблю Лада і музичного дуету Дариі Кузяк i Ольгы Стариньской. На подію просят Ягайлоньскій Університет, Выдавництво Академіцка Книгарня і Музей Ягайлоньского Університету. Припоминаме, што словник мож купити на сторонi Академіцкой Книгарнi, а нарядя створене на його основi мож хоснувати онляйн на плятформi lemko.tools.

Реконструкция Битвы пiд Ґорлицями 2026

Санкова просит до себе на наступну едицию реконструкциi Битвы пiд Ґорлицями, котра плянувана є на 1. мая того рока. За тоту подiю одповiдат Ґрупа Iсторичной Реконструкциi Ґорлицi 1915, котра передає, што тогорiчне видовиско одбуде ся пiд гослом «Гев i тепер». Мат то быти оповicт не лем о войнi, але о двох просторах, на тот раз маме ся призріти тiж людям i тому, як старали ся жыти в роках войны i в повоєнным свiтi. Робота при сценоґрафіi мат ся зачати уж кiнцьом марця.

Фртоґрафiя: Bartłomiej Wilk