Сумар дня на 10. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 10. жолтня/октобра 2025 р.

XXXІІІ Лемківска Тровча Осін

Уж заран зачне ся 33. Лемківска Тровча Осін, яку орґанізує Стоваришыня Лемків при спілорґанізаторстві Стоваришыня «Руска Бурса» в Ґорлицях. Творчы стрічы одбудут ся в днях 11. і 12. жолтня/октобра. В тым році подія посвячена єст сотній річници народин Івана Желема – выдатного лемківского поеты і писменника, давного ґорлицкого бурсака. В суботу Творча Осін буде проходила в Ваппеным, в Здройовым Домі, а в неділю в просторах Руской Бурсы в Ґорлицях. Першого дня подія зачне ся о 15.00 год., другого о 16.00 год. Выступлят творці слова з Польщы і заграниці, а в артистичній части – ансамбль Терочка і Домініка Новотна з піаністом Петром Адамковичом зо Словациі. Доповід о Івані Желемі выголосит проф. Олена Дуць-Файфер. Стрічы товаришыла буде выстава фотоґрафій Петра Басалыґы. Вступне на обі подіі дармо.

Перебудова скрижуваня DK75 в Лабовій

Іщы понад місяц потырват перебудова скрижуваня державной дорогы нр 75 в Лабовій з повітовом дорогом в сторону Котова і Камяной. Мимо прац, кєруючы фурт можут переізджати в обох напрямах при ограничыню скорости до 40 км/год. Головном цілю інвестициі єст звекшыня комфорту кєруючых і поправа безпекы пішых. Кошт інвестициі то близко 3,5 млн злотых. За війт ґміны Лабова, єст то барз важна, третя інвестиция перебудовуюча скрижуваня державной дорогы нр 75 на обшыри ґміны. Актуально буде там іщы монтуване освітліня для двох переходів для пішых і перенесены будут авобусовы пристанкы. Вздолж державной дорогы будуваный єст тіж тротуар долгости 500 м, што додатково має звекшыти безпеку пішых в околици скрижуваня. З обох напрямів будут тіж додатковы пасы до скрутів в сторону Камяной. Інвестором перебудовы єст Ґенеральна Дирекция Державных Доріг і Автострад.

Лемківскій Кєрмеш в Йонкерс

О тыжден, в неділю 19. жолтня/октобра в Йонкерс в штаті Ню Йорк одбуде ся дальшый Лемківскій Кєрмеш, якій што рока орґанізує Карпаторусиньскій Америцкій Центр Lemko Hall. Вчас забавы пригрывала буде русиньска група Lem Joy Trio. На Кєрмешы традицийо сходит ся много нашых родаків прожываючых в Америці – в великій части тоты, котры родили ся іщы в старым краю, але і молоды Лемкы, котры были роджены уж за великом млаком. Што барз тішыт, вельо з них хоснує лемківскій язык.

«Може ся не верну» – вернісаж выставы малярства Давида Здобыляка

Припоминаме, што днес од 18.00 в Ґалериі Штукы в Малопольскым Центрі Культуры Сокіл в Новым Санчы проходит вернісаж выставы малярства Давида Здобыляка пн. «Може ся не верну». На выставі презентуваный єст найновшый цикль образів артисты, навязуючый до його лемківскых коренів і дідовизны та траґічной долі лемківского народу. Вчас вернісажу одбуде ся дискусия з артистом і специяльным гостьом – др. Михалом Шымко, бесіда буде тыкала презентуваного малярского циклю і контекстів лемківской штукы. Веце про выставу прочытате в дописі на нашым портали. В Новым Санчы мож єй буде обзерати до 2. листопада/новембра тр.