Сумар дня на 11. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 11. серпня/авґуста 2025 р.

За нами 45. Лемківска Ватра на Чужыні

В днях 8.-10. серпня/авґуста в Михалові на Нижнім Шлеску проходила 45. Лемківска Ватра на Чужыні, орґанізувана Стоваришыньом Лемків. Офіцийне одкрытя ватры прошло в пятницю вечер. Як першый на сцені запрезентувал ся Репрезентацийный Ансамбль Пісні і Танця Стоваришыня Лемків Ластівочка з Пшемкова, якій в тым році святкує свою 25. річницю істнуваня. Пак делеґаты, в тым представникы локальных власти, зложыли квітя під памятником, упамятняючы дві смутны річниці – 78. річницю Акциі Вісла та 80. річницю выселінь Лемків на радяньску Украіну. Особливе значыня мала присутніст ансамблю Студенка з Калуша на Украіні. Складат ся він в цілости з Лемків выселеных в 40. роках на Украіну і іх потомных, котры фурт дбают о захованя лемківского языка і плекают нашу народну культуру. Кульмінацийным пунктом было розпаліня 45. Лемківской Ватры на Чужыні. В тым році почестна функция положыня огня припала двом Фльоринчанам: Михалови Канючкови і Осифови Лучківцьови. Того дня одбыло ся вручыня нагорід ім. Никыфора – Епіфана Дровняка. Тогорічныма лавреатами нагороды остали Володислав Грабан, Петро Басалыґа і Федір Лабик. Другого дня ватры нагороду отримал тіж Лемківскій Ансамбль Пісні і Танця Ластівочка. Окрем того продолжали концерты на сцені, конкурсы, спортовы змаганя і інчы акциі. Подія, як каждого рока, притягнула великє чысло Лемків і любителів лемківской культуры.

Варгольовы творы з пітсбуржского музею вкажут в Познані

Од 11. вересня/септембра в Pop Culture Gallery в Старым Броварі в Познані буде мож обзерати выставу присвячену єдному з найвызначнійшых русиньскых артистів – Енді Варгольови. На експозициі з назвом „Andy Warhol. A Kind of Retrospective” презентуваный буде выбір творів і приватных материялів та інституцийональных колекций. На трьох поверхах ґалериі одвиджяючы будут видіти м.ін. ориґінальны ґрафікы, поляройды, фільмы, ескізы, архівальны реклямы, запроєктуваны Варгольом окладинкы платен і маґазинів „Interview”. Частину прац удоступнил на потребы експозициі в Познані Музей Енді Варголя в Пітсбурґу. То рідка нагода видіти творы з колекциі той америцкой інституциі, понеже векшіст выстав в Европі єст реализувана во спілпрацы з Музейом Модерной Штукы Енді Варголя в Меджелабірцях. За куратором выставы, єст она збудувана вколо ключового звіданя: ”в якій спосіб творчіст єдного артисты переникнула так вельо обшыри сучасного жытя і чом його візиі фурт так сильно діют?”. Выстава зачне ся вернісажом 11. вересня/септембра і потырват до кінця лютого/фебруара будучого рока.

«Стрічы з лемківском культуром» в Ґожові

Уж в найблизшу суботу в Ґожові Великопольскым одбуде ся чергова едиция «Стріч з лемківском культуром». На подію просит Кружок Стоваришыня Лемків в Ґожові Великопольскым. Подія пройде в рамках циклю культурных імпрез «Добрый вечер Ґожів». XXXI Стрічы з лемківском культуром пройдут на ґожівскым катедральным пляци в суботу 16. серпня/авґуста о 19.00 год. В концерті выступлят Лемківскій Ансамбль Пісні і Танця «Ластівочка», Coolbaba та Rene Bolesa & Band зо Словациі. Вступне дармо.

Джерело фотоґрафіі: Powiat Polkowicki