Сумар дня на 11. вересня/септембра 2019 р.

Приносиме Вам сумар медияльной ґрупы ЛЕМ.фм на ден 11. вересня/септембра 2019 р.

Довершыня будовы С3 з Польковиц до Любіна

Штырі фірмы зголосили ся, жебы докінчыти розгребану будову 14-кілометрового одтинка С3 (S3) з Польковиц до Любіна. Інвестиция мала быти реалізувана пят років, але є превеликє опізніня. На єй докінчыня Ґенеральна Дирекция Державных Доріг і Автострад плянує передати 211 млн зл. Новый выконавця буде мал 12 місяци на докінчыня робіт, не враховуючы зимового періоду. Будова дорогы з Польковиц до Любіна мала быти скінчена в червци/юнію минулого рока. ҐДДДіА кіньцом квітня/апріля одступила од умовы з консорцийом фірм Саліні і Прібекс, якы мали побудувати дорогу, бо выконавця не тримал ся пляну робіт і не платил підвыконавцям. Власти Любіна і Польковиц писали в справі незавершеной будовы дорогы до премєра Матеуша Моравєцкого, жебы приспішыти процедуры, што дозваляют выбрати нового выконавцю. ҐДДДіА в найблизшым часі проаналізує зложены оферты і рішыт, ци до найтуньшой доложыт бракуючу квоту – 17 млн зл.

Відомо, хто іздил потягами Мукачево-Кошыці

Украіньскы Желізниці подали статистикы подорожуючых получыньом Мукачево-Кошыці. Вказує ся, што 55% вшыткых, котры хоснували тото получыня, то заграничны громадяне, а докладні головно Словакы (1/3 вшыткых з той ґрупы), Чехы і Мадяре. Кус менше як піл, 45% подорожуючых од Мукачева до Кошыц потягом то Украінці. Треба спомнути, што пасажерами были тіж громадяне Арґентины, Параґваю і Полудньовой Кореі. Потяг реляциі Мукачево-Кошыці вернул по вісемдесятьох роках. Першый курс прошол 9. червця/юнія тр. Подорож тырват близко 3 годины і 40 минут, до того якісый час потяг стоіт на границі, переважні є то коло піл годины. Перед тым як привернено безпосереднє получыня з Кошыц до Мукачова, зо східньой Словациі мож было достати ся на Закарпатя з вельома пересідками.

Ґалицийскій Квартет з Ґорлиц нагородженый на Змаганях Автентичных Музиків

8. вересня/септембра закінчыла ся 5. едиция Змагань Автентичных Музиків, якы орґанізувала Фільгармонія в Щеціні. Змаганя то конфронтация і стрічы творців народной музикы, якы берут з ріжных джерел: од реконструкциі через фольк, джаз аж по експериментальну музику. Участ в подіі што рока берут і аматоры, і професийны музикы. Нагороды передаваны сут в парьох катеґориях, м.ін. капель, співочых ансамблів ци солистів. Єдном з нагорід є Премія Стоваришыня Авторів ЗАІКС, котром того рока обдарувано Ґалицийскій Квартет з Ґорлиц. Є то смыкова ґрупа штырьох дівчат, яка в своій творчости інспірує ся Лемковином. Минулого рока печатали свою дебютантску платню «Фолькоманія», а в марци того рока выпустили свій першый відеокліп до пісні пн. «Чорне», што зреалізуваный был як раз в опустошеным Чорным. На тогорічну едицию Змагань Автентичных Музиків зъіхали ся артисты з цілой Польщы, од Студзянок, Краснополя через Збоншын, Кольбушову по Скжыпне ци Майдан Королівскій.

Клясична музика і лемківска поезия

Тырват 4. едиция Медженародного Фестівалю пн. «При джерелах». В четвер, пятницю і суботу клясична музика і лемківска поезия вызвучат в Ґладышові, Креници, Бересті і Высовій. В проґрамі концертів творы Баха, Шуберта, Паґаніні ци Вєнявского. Выступлят гушляр Мариюш Мончак, а рецитувати будут Наталия Клинковска, Андрий Трохановскій, Петро Мурянка і Олена Дуць-Файфер. Окрем концертів в проґрамі фестівалю є і прелекция. Доктор Мончак выголосит доповід про характеристику гуцульской і лемківской музикы.