Сумар дня на 11. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 11. вересня/септембра 2025 р.

Тырват V Медженародный Конґрес Русиньского Языка

Од вчера в просторах Пряшівского Університету проходит V Медженародный Конґрес Русиньского Языка, котрого головным орґанізатором є Інститут Русиньского Языка і Культуры Пряшівского Університету. Вчера запрезентували ся тіж представникы з Польщы, а то м.ін. проф. Олена Дуць-Файфер, докторантка Клявдия Новак і редактор ЛЕМ.фм Даміян Трохановскій. ЛЕМ.фм репрезентуют тіж Наталия Малецка-Новак, Петро Медвідь і Юрий Шыпович. На конґресі присутны сут языкознавці зо Словациі, Польщы, Украіны, Сербіі, Чех, Хорвациі, Мадяр, Румуніі, Канады, ЗША і Італиі, при чым векшына з них є присутна особисто, част рефератів была або буде онляйн. В одкрытю конґресу, якє зачало ся од русиньского гымну, взяли участ і честны гості, медже котрыма был ректор Пряшівского Унівесетрту Петер Коня, директорка Центра Языків і Культур Нацийональных Меншын ПУ Аннамария Коньова, Крістіна Пекарова з Уряду полномічного влады Словацкой Республикы про нацийональны меншыны і другій віцепріматор міста Пряшів Петро Крайняк. Конґрес одкрыла Анна Плішкова – директорка русиньского Інституту. Потырват він до заране – 12. вересня/септембра. Окремы секциі має Словация, Польща, Украіна, в єдній секциі будут рефераты з Хорвациі і Сербіі, так само мают єдну секцию Мадяры і Румунія. Окрема буде і на общу тему русиньского языка, а так само на практику русиньского языка.

В Новоселиці одкрыли новый Енвіроцентр

В русиньскым селі Новоселиця, што на Словациі, в суботу 6. вересня/ септембра одкрывали новый Енвіроцентр. Новый Ареал природничого выхованя має помочы селу схоснувати свій потенциял наполно. Новоселиця находит ся на обшыри Нацийонального Парку Полонины і своім положыньом має ідеальны обставины стати освітньом дестинацийом. В рамках ареалу є Інформцийный центр в зреконструуваным Домі Культуры, де заінтересуваны можут отримати інформациі о околици, природі і охороні жывотного оточыня. Будова служыт і як мультіфункийный простір на орґанізуваня освітніх і культурных подій. В ареалі сут тіж ріжны елементы до граня для діти, наукова стежка ци меншый амфітеатр. В рамках проєкту зробила ся і оцельова лавка через ріку Збой. На отворіня Новоселиця зрыхтувала і культурный проґрам.

Позарани хіторонія нового грекокатолицкого владыкы в Польщы

В найблизшу пятницю зачнут ся літургічны обряды звязаны з хіротонійом нового владыкы грекокатолицкой Церкви в Польщы – о. Мариюша Дмитерка, якій буде помічным владыком во вроцлавско-кошаліньскій єпархіі. В пятницю о 17.00 год. во вроцлавскым катедральным соборі буде служена вечырня з чыном архієрейского менуваня владыкы. На наступный ден, в суботу о 10:00 год. буде служена архієрейска Божеска Літургія з чыном архієрейской хіротоніі. Вшыткы богослужыня будут трансмітуваны на YouТубе каналах «Жыве ТВ» і «ЕWTN».

Церков в Квятони номінувана до плебісциту National Geographic «Чуда Польщы 2025»

Памяткова грекокатолицка церков св. Параскєвы в Квятони є номінувана в плебісциті National Geographic «Чуда Польщы 2025». Тото выняткове місце – памятка архітектуры UNESCO, має шансу отримати званя Чудеса Польщы 2025 р. Голосуваня потырват до 13. жолтня/октобра. Каждый може оддати єден голос денні. Голосувати мож на сайті: cudapolski.national-geographic.pl. Церков в Квятони походит з XVII ст. В 2013 р. была вписана як єдна з нечысленных лемківскых церкви до Списку Світовой Спадковины UNESCO.