Сумар дня на 12. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 12. грудня/децембра 2025 р.

Загальнопольскє Одкрытя Зимового Сезону 2025/2026 буде в Креници

Заран, в суботу 13. грудня/децембра в Креници одбуде ся Загальнопольскє Одкрытя Зимового Сезону 2025/2026. Подія пройде в єдным з найкрасше положеных лыжных осередків в Польщы – на Креницкій Яворині. На участників ждут вшелеякы атракциі, а окрем того одбуде ся одкрытя новой, наймодернійшой в Польщы креселковой желізниці – з підгриваныма сіджынями і ослонами проти вітрови. Протягом єдной годины буде могло ньом іхати аж і 2800 осіб. Загальнопольскє Одкрытя Зимового Сезону 2025/2026 одбыват ся під почестным покровительством Іренеуша Рася, секретаря стану в Міністерстві Спорту і Туристикы та Лукаша Смулкы, маршалка Малопольского Воєвідства. Орґанізаторами подіі сут Польска Туристична Орґанізация, Малопольска Туристична Орґанізация, Новосандецкій Повіт, Польскы Кабельны Желізниці і Креницкя Яворина. Подія єст спілфінансувана з середків Малопольского Воєвідства. За словами Іренеуша Рася, секретаря стану в Міністерстві Спорту і Туристикы, знают, як важном туристичном ґрупом в Польщы сут лыжникы і сновбордисты. На Креницкій Яворині будут тіж бесідувати о будучности туристичной бранжы в Польщы, понеже єст то штораз важнійшый елемент польской господаркы.

Ратівникы мали школіня перед зимовым сезоном

А іщы перед офіцияльным стартом зимового сезону пожарникы з коменды в Новым Санчы, як і ратівникы Креницкой Ґрупы GOPR мали школіня на сандецкых убочах. Школіня в обшыри евакуациі кабельных желізниц і інчых кризисовых ситуаций то постійный елемент в календари тых ратівничых ґруп. Ключове єст перепрацуваня координациі діянь в припадку авариі желізниці. Школіня мают на ціли припомянути процедуры, зліпшыти ратівничы технікы та прирыхтувати ратівників до ефективного і безпечного діяня. Припомнийме, што в минулым зимовым сезоні ратівникы Креницкой Ґрупы GOPR провели понад 600 ратівничых діянь і дали поміч понад 500 пошкодуваным.

Штука Лемків / Карпатскых Русинів в Державным Етноґрафічным Музею в Варшаві

«Формы присутности. Штука Лемків / Карпатскых Русинів» – так звучыт наголовок часовой выставы, яка презентувана буде од 17. січня/януара до 30. червця/юнія 2026 р. в Державным Етноґрафічным Музею в Варшаві. Єст то перша так шырока презентация артистичного доробку Лемків, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША. Як подают орґанізаторы выставы, Державный Етноґрафічный Музей, порушат она вельорічну тишу і вказує выключыня присутне в істориі інституцийонального приниманя штукы. Вказує, же спадковина Лемків / Карпатскых Русинів не вертат, але фурт тырват, мимо проб єй анулюваня і асиміляциі, як жывый елемент сучасной культуры. Куратором выставы єст др Михал Шымко, а серед медияльных патронів находят ся ЛЕМ.фм і Стоваришыня «Руска Бурса» в Ґорлицях.