Сумар дня на 12. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 12. листопада/новембра 2024 р.

Вмер Януш Квока, член Стоваришыня Лемків. Вічна Йому Памят!

З жалом інформуєме, што 5. листопада/нoвембра несподівано вмер Януш Квока, член Стоваришыня Лемків, заанґажуваный в справы православной церкви і присутный в лемківскым світі. Покійный Януш Квока вродыл ся 4. серпня/авґуста 1970 р. на Підляшы а його рід выхидит з Ізб. Был активным членом Кружка Стоваришыня Лемків в Любіні. Каждого рока брал участ в локальных любіньскых святкуванях Дня Русинів Польщы. Як делеґат Кружка брал участ в Х Конґресі Стоваришыня Лемків. Похоронны богослужыня зачнут днес в церкви св. Тройці в Любіні, Парастас з чытаньом Псалтыря о 18.00 год. Похоронна Літургія буде одслужена в середу, 13. листопада/новембра о 10.00 год., а пак одведіня Покійного на цмонтір. Родині покійного высловлюєме щыры слова спілчутя. Вічна Йому Памят!

Розпочал ся наступный етап модернізациі церкви в Ліщынах

В Ліщынах взновили модернізацию близко 200-літньой церкви св. Апостола Лукы. Ремонт церкви веденый єст уж около 20 років, лем проходит етапами. Актуальны роботы присвячены сут зовнішій части святыні і сут продолжыньом прац зачатых в минулым році. В рамках модернізациі буде выміненый дах і ґонты при святыни. Церков побудувана в 1835 р. єст єдном з перлин Лемковины, вписана на Шляк Деревяной Архітектуры і до реґістру забытків. Вшыкты роботы ведены сут на осін. Літом на поді своі колоніі мают мышпергачы, котры на зиму зміняют своє локум. Модернізация не была бы можлива, як бы не дофінансуваня признане з Міністерства Культуры і Нацийональной Спадковины і Польского Ладу.

Єпархія Фінікс має нового єпископа, отця Артура Бубневича

8. листопада/новембра на праздник Собору святого Архістратига Михаіла і остатніх безтілесных сил, в Ватикані оголошено, што папа римскій Франциск призначыл за нового правлячого єпископа Єпархіі Фінікс отця Артура Бубневича. Єпархія Фінікс належыт до русиньской Пітсбуржской митроплиі і од 2021 р. была ведена без єпархы. Владыка Артур Бубневич, дотеперішній парох Парохіі Матери Божой Безпрестанной Помочы в Альбукерке, в Новым Мексику, вродил ся в Перечыні, на Підкарпатю. Семінарию скінчыл в Ужгороді, так як і теолоґічны студия. Был секретарьом про проєкты в канцеларі Мукачівской Єпархіі і єдночасно спілпрацувал з владыком Мілшном Шашіком при формуваню молодежы і навчаню анґлицкого языка. В 2013 р. выіхал до Зъєднаных Штатів Америкы, де был рукоположеный на діакона, а пак на священника.

Уж за нецілы два тыжні премєра лемківской оперы «Голос»

Припоминаме, што ближыт ся премєра лемківской оперы «Голос». Уж 24. листопада/новембра в Нацийональным Форум Музикы во Вроцлаві будут одограны два спектаклі – о 16.00 год. і 18.30 год. Неодолга мают быти доступны білеты. «Голос» то проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Деталі о опері можете чытати на єй файнпейджы в сіти Facebook. Припопинаме тіж, што реализацию проєкту мож підперти через інтернетову колекту. Старчыт на сайті zrzutka.pl вписати госло «Премєра лемківской оперы Голос».

фот. Gorlice nasze miasto