Сумар дня на 13. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 13. листопада/новембра 2025 р.

Свято Копальників – уж о хвилю в Любіні

Любіньска православна парохія Св. Тройці і єй парох о. Богдан Репела, якій є капеляном копальників, просят до участи в тогорічных святкуванях Дня Копальників – праздника св. Варвавы. З той нагоды 4. грудня/децембра в любіньскій церкви буде служена Божеска Літургія. Богослужыня зачнут ся о год. 8.30, а буде ім проводил владыка Юрий, архієпископ вроцлавско-щеціньскій, православный ординарий Польского Войска. Так як по інчы рокы, до молитвы прошены сут вшыткы копальникы. Святкуваня Дня Копальників як раз в Любіні вяже ся з тым, што великє чысло вірных той парохіі робит в компаніі KGHM, в тым сут серед них копальникы, якы наштоден роблят під земльом. Того рока делеґация копальників з Нижнього Шлеска взяла участ в першым історичным поломництві копальників на Святу Гору Ґрабарку.

Праздник в парохіі в Самбожы

В минулу неділю, 9. листопада/новембра в передден літургічой памяти св. Великомучениці Параскєвы, правовославна парохія в Самбожы на Нижнім Шлеску одсвяткувала свій домашній праздник. Літругію правил парох о. Ігор Габура. Прибыли вірны з сусідніх парохій. Храм св. Параскєвы в Самбожы был посвяченый владыком Юрийом в 2018 р. То невелика парохія, яку творят потомны выселеных з Лемковины. Належыт она до тых найстаршых на західніх землях – была офіцияльно ериґувана в 1954 р. Парохія отримала покровительство св. Параскєвы – більшіст вірных походила з Чырной, де церков была під такым же покровительством. Перша Божеска Літургія была одправлена 7. квітня/апріля 1954 р. Служыл єй о. Штефан Бігун, якій перше нюс душпастырску опіку во Фльоринці. Влони громада святкувала ювілей 70-літя.

Дроны на дорозі Ропа – Біч

Кєд мекшате вздолж державной дорогы но. 28 – не чудуйте ся, коли над вашом хыжом перелетит дрон. Од вчера до 18. листопада/новембра літают дроны, якы роблят повітряну фотоґрафічну інвентаризацию, яка є етапом перед перебудовом дорогы на одтинку Ропа – границя малопольского воєвідства. Згідно з інформациями переказаныма выконавцьом, діяня будут ведены на замовліня Ґенеральной Дирекциі Державных Доріг і Автострад Одділіня в Кракові. Цілю є позыскати актуальны знимкы з обшыри першой леніі – в пасі до 60 метрів од оси державной дорогы но. 28. Знимкуваны будут ґаздівкы, выгоны до них, елементы інфраструктуры, а тіж потокы. Материял має лем поглядовый характер і не буде в ним особовых даных, ани не буде служыл до контролі жытелів. Дроны будут літати за дня. Тырваючы поміры то єден з етапів діянь, якы попереджают перебудову дорогы на одтинку Ропа – Біч. Модернізация має быти зреализувана в найблизшых роках.

Неодолга цикль подій «Лемкы в Центрі» в Любіні

Припоминаме, што уж о хвилю в Любіні одбуде ся цикль подій пн. «Лемкы в Центрі». 21. листопада/новембра о 18.00 год. в Ґалериі Cuprum Арена обуде ся показ моды з колекциі РУСИНКА Анны Мариі Зиґмунт та концерт ЛАПіТ «Ластівочка». Наступного дня о 11.00 год. буде мож зайти до православной церкви св. Тройці, де парох, о. Богдан Репела оповіст о істориі любіньской парохіі та загальом о православю. 24. листопада/новембра в Ґалериі CDT в Любіні буде вернісаж выставы творчости Епіфана Дровняка – Никыфора Креницкого. Першый раз в істориі Любіна буде запрезентувана творчіст того выдатного лемківского творці. Выстава буде доступна місяц – до 19. грудня/децембра.