Сумар дня на 13. мая 2025 р.

Приносиме вам сумар медияльной ґрупы ЛЕМ.фм+ на ден 13. мая 2025 р.

Прелекция про Павла Цібере

Музей Русиньской Культуры 7. мая зорґанізувал подію «Забытый Цібере». Прошла она в рамках святкуваня 80. річниці закінчыня ІІ світовой войны та 115. річниці народжыня Павла Цібере. Як уж вказує назва подіі, головном темом был Павел Цібере, вызначный русиньскій політик, котрый заслужыл ся не лем для самых Русинів, але тіж чехословацкой істориі. В часі подіі рефераты запрезентувало штырьох прелеґентів: Радка Ондеркова, Станіслав Конечный, Марк Танчинец, Люба Кральова. Більше о Павлі Цібере мож прочытати на нашым сайті в статі Петра Медвідя.

Ніч Музеів в Музею Русиньской Культуры в Пряшові

Як і в попередніх роках Словацкій Нацийональный Музей – Музей Русиньской Культуры в Пряшові бере участ в загальноевропейскій подіі Ніч Музеів. Того рока Музей просит до Пряшова в суботу 17. мая. Як передала представничка інституциі, для одвиджаючых зрыхтувано многє чысло атракций. Подія зачынат ся о 14.00 год. і тырвала буде аж до 22.00. В рамках Ночы Музеів мож буде обзерати часову выставу «Меджі» авторства студентів Школы Умелецкого Промыслу в Пряшові. Будут тіж атракциі для наймолодшых – творчы варштаты. А в навязаню до оголошыня 2025 рока Роком Русиньского Языка в проґрамі подіі находит ся част, в котрій ся буде споминало на выняткову русиньску прозаічку Марию Мальцовску, лавреатку Премії Александра Духновича за русиньску літературу. Будут тіж концерты: клясичной музикы, русиньской гіп-гоповой ґрупы Calibri Gang Фольклорного Колективу Маковиця зо Свідника. Додатково, через цілый ден мож буде взяти участ в звиджаню вшыткых експозиций музею разом з провідником.

В Полянах Суровичных тырват реконструкция понад 100-літньой камінной капличкы

Думкодавцьом одбудовы камінной капличкы в Полянах Суровичных єст Вітольд Ґжесік з Варшавы, автор книжок о Низкым Бескіді. В роботах участ берут особы, котрым Низкій Бескід єст особливо близкій. То уж другій раз, коли ґрупа волонтерів стрічат ся, жебы поправити конструкцию капличкы. Тым разом удало ся провести реконструкцию части мурів і одбудувати склипліня. Як подал Вітольд Ґжесік, капличка хоц формальні не єст забытком, то і так єст цінным материяльным слідом бывшых жытелів села. Роботы будут ведены в тым році або аж і в будучым, сут бо потрібны дальшы помагаючы при ремонті обєкту.

Ботанічны варштаты в Ожынній

Еколоґічный Осередок в Ожынній просит до участи в ботанічных варштатах. Подія пройде в неділю 18. мая, а варштаты вела буде Анета Шмыд. В проґрамі находит ся спацер з розпознаваньом зіля, творіня натуральных косметиків, выкорыстаня зіля в кухни та многє чысло інформаций придатных наштоден. На варштаты обовязуют скоршы записы, кошт участи то 5 злотых. Дрібниці находят ся на фейсбуковым сайті Осередка.

фот. Polskie Radio Rzeszów