Сумар дня на 13. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 13. серпня/авґуста 2025 р.

Шляхтівска Русь на старій фотоґрафій

Етноґрафічный Музей в Кракові, Малопольскій Центр Культуры в Новым Санчы та Інститут Нематерияльной Спадковины Карпатскых Наций в Людзімєжы просят на одкрытя пленеровой выставы «Шляхтівска Русь на старій фотоґрафій зо збірок Етноґрафічного Музею в Кракові». Подія пройде в найблизшый четвер 14. серпня/авґуста на рынку в Явірках і зачне ся о 14.00 год. Выстава складат ся з унікатовых знимок, такых як портреты авторства Іґнация Крєґера, документациі деревяной архітектуры Романа Райнфуса і Станіслава Лещыцкого ци істориі фолюша з Явірок, котрый тепер єст частю музейной колекциі. Вступне дармо.

Новый проєкт охороны мышпергачів

Державны Лісы зачали проєкт «LIFE PODKOWIEC PLUS: вертаня до ліса – охорона мышпергачів в цілости», котрого цілю єст забезпечыня та поправа становиск мышпергачів та зміцнене спертя іх охороны. Проєкт має меджедержавный характер, рівночасно реализуваный єст на обшыри Чех, Словациі і Румуніі. Координаторами по польскій стороні сут Польскє Товариство Приятелів Природы, десят надлісництв і штырі Реґіональны Дирекциі Лісів. В рамках проєкту на полудни Польщы побудуют десят веж, котры будут схороніньом для мышпергачів. Будуваны вежы окрем части над земльом, до охороны в літнім періоді, будут мати тіж част під землом, певниці до гібернациі в зимі. Перша вежа єст уж ставляна в лісах надлісництва Рыманів.

Ремонт дорогы в Жеґестові і селі Чырна

Днес зачал ся ремонт повітовой дорогы 1517 K в Жеґестові. Модернізуваный єст одтинок в страну Щавника, од желізницьового переізду при школі. Роботы ведены будут на долгости коло 1,5 км. Як передал директор Заряду Доріг в Новым Санчы, модернізация повязаня єст з інвестицийом міста Мушына, котра на тым самым одтинку буде будувала стежку. В місци ремонту веденый буде наперемінный рух. Роботы тырвати будут до 15. жолтня/октобра. Од половины серпня/авґуста зачне ся тіж розбудова ґмінной дорогы в селі Чырна. Згідні з представленым гармоноґрамом дорога буде переіздна в днях 15.-17. і 22.-31. серпня/авґуста. В решту дни, аж до 12. вересня/септембра траса буде цілковито закрыта для руху. Для подорожуючых в тым періоді кєруючых ся в страну Устя Руского зрыхтувано обізд через Фльоринку і Брунары.

Сут іщы білеты на першу лемківску оперу «Голос»

Припоминаме, што в тым тыжни зачала ся продаж білетів на черговый показ лемківской оперы «Голос», котра буде презентувана 7. вересня/септембра в Краківскій Опері. Премєра оперы «Голос» одбыла ся кінцьом минулого рока в Нацийональным Форум Музикы во Вроцлаві. «Голос» то проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Білеты мож іщы купити на інтернетовым сайті Краківской Оперы.