Сумар дня на 13. січня/януара 2026 р.

Приносиме вам сумар медияльной ґрупы ЛЕМ.фм+ на ден 13. січня/януара 2026 р.

«Варгольове „I am from nowhere”» – опроваджаня по выставі «Формы присутности. Штука Лемків/Карпатскых Русинів»

В рамках товаришучых подій до часовой выставы пн. «Формы присутности. Штука Лемків/Карпатскых Русинів», яка презентувана буде од 17. січня/януара до 30. червця/юнія тр. в Державным Етноґрафічным Музею в Варшаві, одбуде ся 21. січня/януара тематичне опроваджаня по тій выставі пiд назвом «Варгольове „I am from nowhere”». Поведе го куратор выставы – др Михал Шымко. Подiя буде посвячена транспопови – напрямови, якiй лучыт перетинаня границ достоменности, приналежности i артистичных дисциплін з естетиком попкультуры. Порушаны будут квестиi «присутности» Лемкiв/Карпатскых Русинiв в штуцi, iх памяти i достоменности, од карпатского дідицтва по ґлобальны стратеґii сучасной штукы. Стрiча буде тлумачена на польскiй жестовый язык.

Родинны варштаты в Державным Етноґрафічным Музею в Варшаві в рамках выставы «Формы пристутности. Штука Лемків/Карпатскых Русинів»

21. і 22. січня/януара в рамках зимовых вакаций Державный Етноґрафічный Музей в Варшаві орґанiзує і родинны варштаты товаришучы выставi «Формы пристутности. Штука Лемків/Карпатскых Русинів». Проґрам кєруваный є до дiти, молодежы i дорослых. Занятя мают едукацийно-творчый характер i навязуют до темы выставы, приближаючы участникам культуру i штуку Лемкiв/Карпатскых Русинiв. В експозицийным просторi одбудут ся плястичны варштаты, де буде мож створити рустикальны декорациi iнспiруваны карпатскыма краєвидами присутныма на выставi. Дрібниці найти мож на страні ДЕМ.

Ґном «Лемко» на памятку оперы «Голос»

Лемківскій Ансамбль Пісні і Танця «Кычера» отворил збірку на плятформi Zrzutka.pl на створiня ґнома «Лемка» во Вроцлавi як памятку першой лемкiвской оперы «Голос». Тота ініциятива мат утырвалити речену подiю в просторi мiста i пошыряти лемкiвску культуру. Фіґура ґнома мат представляти го в традицийным облечыню, з інструментом, точнiйше – гушлями. Орґанiзаторы заохочают цiле оперове соспiльство спомагати колекту i плянуют конкурс на iмя ґнома. В тот спосiб каждый може взяти участ в творiню першого ґнома «Лемка». На тот момент повело ся зобрати веце як 1700 злотых з потрiбных 15 000. До кiнця акциi остало iщы 12 дни.

О пiлночы витаме Новый Рiк. Желаня од медияльной ґрупы ЛЕМ.фм+ 

За юлияньскым календарьом днеска святкуєме Маланку, жебы о пілночы привитати Новый Рік. Першый ден січня/януара в юлияньскым календари то тiж памят св. Василия, так што і вшыткым Василям – на многы і благы літа. Витаючы Новый Рік, желаме предовшыткым здоровля, най же цілый 2026 рік, і тот григорияньскій і юлияньскій, буде про нас о вельо ліпшый, як старый. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.

Фотоґрафiя: https://zrzutka.pl/xzt333