Сумар дня на 13. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 13. жолтня/октобра 2025 р.

На Лемковині прошла XXXIII Лемківска Творча Осін

В минулый вікенд проходила 33. едиция Лемківской Творчой Осени, орґанізуваной Стоваришыньом Лемків при спілорґанізаторстві Стоваришыня «Руска Бурса» в Ґорлицях. В тым році подія была посвячена 100. річници народин Івана Желема – выдатного лемківского поеты і писменника, давного ґорлицкого бурсака. Іван Желем родил ся в 1925 р. в Вапенным. В 1937 р. вступил в шор выхованків Руской Бурсы. Был єдным з тых, якым пришло дальше жытя провести на радяньскій Украіні. Писал не лем патріотичны вершы, але тіж гуморескы, новелі, оповіданя, та критичны і публицистичны тексты. Так тіж суботня част Лемківской Творчой Осени одбыла ся в рідным селі поеты – Ваппеным, в Здройовым Домі. Традицийні, недільна част проходила в просторах ґорлицкой Руской Бурсы. Запрезентували ся творці слова з Польщы і заграниці, были музичны выступы, а доповід о Івані Желемі выголосила проф. Олена Дуць-Файфер. Стрічы товаришыла выстава фотоґрафій Петра Басалыґы.

Русиньскы артефакты будут здіґітализуваны

Русиньскы експонаты будут мати діґітальны копіі. Здіґітализуваны будут выбраны експонаты Крайского Музею в Пряшові і Словацкого Нацийонального Музею – Музею Русиньской Культуры в Пряшові, як і двох партнерскых музеів в закарпатскій области Украіны. Завдякы медженародному проєктови пн. «Віртуальны культурны музеі» постепенно возникают діґітальны копіі довєдна 400 збірковых предметів і 12 сакральных обєктів. В пряшівскых музеях выбраных до діґітализациі было 200 меншых артефактів, Палац Ракочія в Пряшові, каштелі в Стропкові і Ганушівцях, памятник князя Лабірця в Габурі, як і деревяны храмы в русиньскых селах Тополя і Кривый. Здіґітализуваны предметы будут частю віртуальной переглядкы музеів, і будут доступны на вебсайті, котрый ся творит так само в рамках проєкту. Дрібниці чытайте в дописі на нашым портали.

«Волохы в істориі і культурі Карпат» – одкрыта конференция

Музей Народного Будівництва в Саноку просит на загальнодоступну наукову конференцию пн. «Волохы в істориі і культурі Карпат», яка одбуде ся в четвер 23. жолтня/октобра в в конференцийным будинку на обшыри Етноґрафічного Парку. Подія має быти нагодом до рефлексиі над присутністю і влияньом волошской соспільности на культуру, історию і достоменніст реґіону Карпат. В проґрамі находят ся выступліня запрошеных прелеґентів з науковых осередків в Польщы і з заграниці, як і працівників Музею. Орґанізаторы підкрисляют, што подія має одкрытый характер і направлена єст не лем на дослідників, але і пасийонатів істориі, народной культуры, як і вшыткых заінтересуваных темом Карпат.

ХVIII Стрічы Трьох Поколінь з Лемківском Культуром на Нижнім Шлезску

Уж о нецілы два тыжні на заході пройдут 18. Стрічы Трьох Поколінь з Лемківском Культуром, орґанізуваны Пшемківскым Кружком Стоваришыня Лемків. Подія потырват два дни. Перша стріча одбуде ся в пятницю 24. жолтня/октобра в Хойнові, в Містецкым Осередку Культуры Спорту і Рекреациі. Зачне ся о 18.00 год. О ден, в суботу 25. жолтня/октобра, подія перенесе ся в просторы Пшемівского Осередка Культуры і Бібліотекы. Початок о 16.00 год. Традицийно тіж знаме єдно – выступит Лемківскій Ансамбль Пісні і Танця «Ластівочка». Загадком, яка выявит ся аж вчас подіі, будут дальшы гості – ансамблі, якы того рока выступлят на запрошыня орґанізаторів.