Сумар дня на 14. липця/юлия 2025 р.

Приносиме вам сумар медияльной ґрупы ЛЕМ.фм+ на ден 14. липця/юлия 2025 р.

Свято апостолів Петра і Павля на Святій Горі Явір

В минулу суботу 12. липця/юлия православны Лемкы традицийно зышли ся на Святій Горі Явір, жебы святкувати ден святых апостолів Петра і Павла та одзначыти 100. річницю обявліня ся Лемкам Богородиці. На торжество пришли соткы вірных з Лемковины, заходу, Пряшівской Руси і дальшых части державы. Служыло трьох епархів – архієпископ люблиньско-холмскій Авель, архієпископ перемышльско-ґорлицкій Паісий та єпископ Гайнівскій Павел, при асисті локальных і прибывшых священників. Свята Літургія была правлена перед новобудуваном церквом, яка має быти памятником трьох ювілеів православной церкви в Польщы: 100-літя Автокефалиі ПАПЦ, обявліня Богородиці на Горі Явір і повороту Лемків до віры вітців – православя.

Грекокатолицкє поломництво на Святу Гору Явір

Заран, в віторок, 15. липця/юлия Божеском Літургійом в церкви в Розділю зачне ся грекокатолицкє поломництво на Святу Гору Явір. Першого дня поломникы підут на Мацину, через Ропицю Руску до Маластова. В середу перейдут з Маластова через Прислоп до Новиці, в четвер підут через Устя Рускє, Квятон, Ганчову ґу Высовій. В пятницю, 18. липця/юлия одбудут ся головны грекокатолицкы святкуваня на Святій Горі Явір. О год. 9.30 буде одправленый Молебен до Пресвятой Богородиці, а о 10.00 год. зачне ся архієрейска Літургія. Тогорічны святкуваня для Русинів на Лемковині будут о тілько вынятковы, што богослужыня очелит Высокопреосвященный Йона Максим, пряшівскій грекокатолицкій архієпископ і митрополита при сослужыню другых єпископів та священників з Польщы. По служыню на Яворі, о год. 12.00 на цмонтери в Высовій буде одслужена панахіда при гробі Фіриі Демянчык, якій перед 100 роками обявила ся Пресвята Богородиця.

Ближыт ся 45. Лемківска Ватра на Чужыні

В четвер 10. липця/юлия члены Стоваришыня Лемків і волонтеры зобрали ся на ватряным поли в Михалові, де провели основны працы перед 45. Лемківском Ватром на Чужыні. Лемківска Ватра в Михалові в тым році одбуде ся в днях од 8. до 10. серпня/авґуста.

Новый єпископ грекокатолицкой вроцлавско-кошаліньской єпархіі 

Грекокатолицка вроцлавско-кошаліньска єпархія має нового помічного єпископа. Як інформувал Ватикан 10. липця/юлия папа Лев ХІV благословил рішыня Синоду Єписопів Украіньской Грекокатолицкой Церкви і на помічного єпископа вроцлавско-кошаліньской єпархіі призначыл о. Мариюша Тому Дмитерка.

Обмудсман представил увагы тыкаючы переписів тыкаючых шкільництва меншын

Соймова Комісия до справ Петиций розсмотрює петицию в справі зміны переписів тыкаючых принципів орґанізациі вчыня меншынового языка в школі. Омбудсман представил ведучому Комісиі Рафалови Бохенкови увагы тыкаючы переписів тыкаючых шкільництва меншын. Проблем был вказаный в поясняючым поступуваню, якє тыкало практичных консеквенций ріжных інтерпретаций переписів закону о системі освіты та закону – Право освітове в обшыри орґанізациі вчыня языка меншыны в публичных школах, в котрых вшыткы ученикы і учениці сут обняты обовязком науком того языка. Анализа довела омбудсмана до внеску, што для запевніня стабільного фунґуваня шкіл для меншын конечна єст новелизация реченых законів. Актуально переписы не прецизуют консеквенций зложыня освідчыня о резиґнациі з наукы меншынового языка в школах, де вшыткы ученикы сут обняты обовязковым вчыньом того языка.

Джерело фотоґрафіі: www.orthodox.pl