Сумар дня на 14. січня/януара 2026 р.

Приносиме вам сумар медияльной ґрупы ЛЕМ.фм+ на ден 13. січня/януара 2026 р.

Храмове свято в Конечній

За юлияньскым календарьом празднуєме днес Новый Рік – з той нагоды продолжаме вчерашні новорічны желаня – най ся Вам веде, каре і щєстит цілый 2026 рік. Першый ден Нового Рока за юлияньскым календарьом то тіж храмове свято парохіі в Конечній, де находит ся єдина на Лемковині церков, котрой покровительом єст Святый Василий Великій. Святыня в Конечній была вознесена в 1905 році як грекокатолицкій храм. По выселінях в обєкті час до часу правили римокатолицкы богослужыня для осадників, а од 1969 рока церков переказано Польскій Автокефальній Православній Церкви, як дочырній храм парохіі в Ждыни. В послідніх роках церков перешла ґенеральный ремонт. Цілій конечняньскій спільноті, а тіж вшыткым Василям – на многая і благая літа.

Десяткы примірів русиньской штукы в Варшаві

Припоминаме, што од найблизшой суботы в Варшаві, в публичній єдиници – Державным Етноґрафічным Музею, першый раз в істориі буде в так обшырным вымірі презентувана русиньска штука. Образы, знимкы, різбы, інсталяциі і інчы реализациі штукы близко шістдесятьох артисток і артистів з ріжных держав по світі, в якых жыют Русины, будут вказуваны шырокій публиці. Думкодавцьом і куратором выставы єст др Михал Шымко. Передаєме короткє запрошыня од головного орґанізатора той важной для Русинів обще подіі:

Ремонтуют русиньску церков в Празі

Як поінформувал порталь iRozhlas.cz, осіню минулого рока теслярі докінчaли реконструкцию деревяной церкви Святого Михаіла Архістратига в Празі. Того рока буде іщы зроблена стріха і три бані. Православный храм з XVIII столітя, котрый походит з Підкарпатской Руси, а днес стоіт в Кіньского Загороді в Празі, згоріл в жолтни/октобрі 2020 рока. Од 2024 рока столиця Ческой Республикы – Прага, реконструує церков. На роботы той цінной русиньской архітектонной памяткы проходила і соспільна колекта. Вчас робіт теслі дбали о автентичну технолоґію. Самы ішли до ліса выберати дерева, пак стинали іх згідні з люнарныма фазами, ручні, так як то было давно. Вшыткы нарядя мали ручны – пилы, сокыры, цілый тартак. Церков была двакратно транслокувана. Другы переносины, до Прагы, котры одбыли ся в 1929 році, прошли в рамках святкуваня 10. річниці того, што Підкапратска Русь стала ся офіцияльні частю Чехословациі.

Концерт коляд в православній катедральній церкви св. Тройці в Ґорлицях

В найблизшу суботу в православній катедральній церкви св. Тройці в Ґорлицях одбуде ся концерт коляд. Запрезентуют ся три хоры – хор Клірос з Ґорлиц, хор Зоря з Устя Руского та парохіяльный хор православной катедры в Ґорлицях. Вступне на выступы дармо, початок концерту о 16.00 годині. Орґанізатором концерту є місцева православна парохія.