Сумар дня на 14. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2025 р.

Ґорлицкій Повіт отримал дофінансуваня на ремонт і модернізацию 12 одтинків дорогы

Ґорлицкій повіт, ґміна Ропа, Санкова і Устя Рускє отримали дофінансуваня на ремонт і модернізацию 12 одтинків дорогы, котры были пошкоджены в часі тогорічных дощів. Разом квота дофінансуваня то понад 7 млн зл. В ґорлицкым повіті дофінансуваня буде перезначене на перебудову одтинка Ропа-Брунары, Маластів-Ясюнка та трасу Ганчова-Ставиша-Снітниця. Так само три інвестициі будут реализуваны ґміном Устя Рускє, то єст ремонт дорогы Ґладышів-Устя Рускє част коло лісничівкы, ремонт одтинка Ждыня-Липне-Чорне та ремонт трасы з Нижного Реґєтова до Выжнього Реґєтова. В ґміні Ропа дофінансуваня буде перезначене м.ін. на ремонт одтинка дорогы в Лоси, а в ґміні Санкова ремонт тыкат двох одтинків дорогы в Мацині і Рыхвалді. В рамках тогорічного проґраму помочы по заливах Малопольща отримала разом 20 млн зл. Найбільша част дофінансуваня трафила до ґорлицкого повіту, де шкоды были найбільшы. Переданы середкы дозволят не лем на одбудову доріг, але тіж на модернізацию перепустів та спертя побочы.

Ґміна Крампна буде ліпше зрихтувана на кризовы ситуациі

Ґміна Крампна отримала дофінансуваня на реализацию задач з обшыри охороны населіня і цивільной обороны. В першым тыжни жолтня/октобра війт ґміны Крампна Катажына Мацєйчык підписала в Уряді Підкарпатского Воєвідства два догваріня на дофінансуваня задач з обшыри обороны і охороны жытелів. Середкы будут перезначены на актуальны выдаткы і будучы інвестициі. В рамках реализациі проєктів ґміна купит необхідне выпосажыня і ґратя, што м.ін. поправлят безпеку і зрыхтує жытелів ґміны на кризовы ситуациі.

«Основна Школа в Одырным в роках 1912-1972»

Ґмінна Бібліотека в Устю Рускым просит на історичну прелекцию «Основна Школа в Одырным в роках 1912-1972». Подія пройде 17. жолтня/октобра о 16.00 год. в ґмінній бібліотеці і поведе ю Адам Баняк. В часі стрічы присутны будут мати нагоду побесідувати о способі вчыня в минулым віку, дознати ся о істориі школы, учытелях, учениках і подіях, котры записали ся в памяти жытелів. Стріча буде тіж нагодом, жебы спомнути на минулы часы. Додатково мож буде обізріти выставу захованых документів і знимок. Вступне дармо.

На одтинку дорогы но. 28 в Шымбарку обовязує наперемінный рух

В Шымбарку уактивнило ся осувиско, што спричынило пошкоджыня державной дорогы но. 28. З той причыны на одтинку коло 150 метрів обовязує наперемінный рух. Інформацию о записаных рухах осувиска передала Ґенеральна Дирекция Державных Доріг і Автострад. Знищыня обнимат пас руху в напрямі Ґорлиц, котрый на тоту хвилю єст закрытый для руху і моніторуваный ґеолоґами і інжынєрами. Закля што не рішено о ограничыню тонажу, єднак не єст то выключене. Подібні, кєд стан дорогы ся погіршыт, можливе єст вызначыня альтернативной трасы.

«Дорогы і Бездорожа» – Ясельскій Літературный Фестіваль

Од вчера в Яслі проходит Ясельскій Літературный Фестіваль «Дорогы і Бездорожа». Подія тырвала буде аж до 25. жолтня/октобра в Містецкій Бібліотеці в Яслі. Цілю фестівалю єст стріча з авторами, котры сут звязаны з ясельском земльом, Низкым Бескідом і Підкарпатьом. То нагода до уьасти в цікавых, інспіруючых і одкрываючых бесідах. Орґанізаторы задбали о богатый проґам, так што каждый найде дашто для себе. В часі Ясельского Літературного Фестівалю порушена буде тіж тема акциі «Вісла», до котрой в своіх творах навязує авторка Мария Стшелецка, знана з нагорожуваной сериі «Бескід без кіту». Стріча присвячена Лемковині пройде 21. жолтня/октобра о 16.00 год. в містецкій бібліотеці в Яслі.

fot. Małopolski Urząd Wojewódzki w Krakowie