Сумар дня на 15. червця/юнія 2021 р.

Приносиме вам сумар медияльной ґрупы ЛЕМ.фм+ на ден 15. червця/юнія 2021 р.

Крениця глядат еколоґічного способу огріваня воды

Плянуваны в Креници ґеотермальны досліджыня найправдоподібнійше не будут зреализуваны. В 2020 році Крениця была обнята пілотажовым проґрамом Міністерства Климату і Державного Фонду Охороны Середовиска і Водной Господаркы пн. «Місто з Климатом». Цілю проєкту єст глядати еколоґічны розвязаня, котры ограничат емісию шкідливых для здоровля і середовиска ґазів. Єдном з думок было провести ґеотермальне досліджыня під Креницком Яворином, де быти може, подля ґеолоґів, находят ся джерела горячой воды, котры могли бы выкорыстати жытелі Крениці. Єднак зо взгляду на кошт цілой інвестициі, потрібных бы было аж 140 млн зл, та великє ризико браку успіху думка робити ґеотермальны досліджыня была стримана. Міністерство Климату запропонувало інчый спосіб еколоґічного огріваня воды – будову находячых ся під земльом помп тепла. Як повіл для «Краківской Ґазеты» бургомайстер Крениці Пьотр Рыба, тепер такє розвязаня не єст згідне з пляном заґаздуваня міста, а што гірше – може нарушыти джерела мінеральной воды.

Карпатскє Свято вертат по річній перерві 

Малопольскій Центр Культуры SOKÓŁ просит 27. червця/юнія до Ґалицийского Місточка в Новым Санчы на XVIII свято карпатскых культур. В часі Карпатского Свята мож буде не лем корыстати з атракций Ґалицийского Місточка ци попрібувати реґіональны стравы, але тіж взяти участ в великым кєрмешу і купити выробы карпатскых артистів. Орґанізаторы задбали тіж о пару атракций для наймолодшых, будут м.ін. варштаты плетіня макрам ци робліня чачок. В часі подіі на сцені запрезентуют ся ансамблі з ріжных стран Малопольщы, м.ін. з Телича ци Стружів. Вступ на Карпатскє Свято єст дармовый.

Сут уж першы даты, коли возникне штучный резервуар Конты-Мысцова

В пятницю, 11. червця/юнія, до Мысцовой приіхал Пшемыслав Даца, Презес Нацийональной Водной Господаркы Польскы Воды з Варшавы. Як повіл, перед кінцьом 2023 рока формальности повинны быти закінчены, а згідні з гармоноґрамом в 2027 році закінчыт ся будова резервуару. Вчера зачали ся консультациі з жытелями обшыри, котра буде заляна водом. Як подают урядникы, протягом найблизшых двох тыжнів повторена буде анкєта в справі становиска жытелів на тему будовы резервуару. Кошт будовы інвестициі, разом з одшкодуваньом та новом інфраструктуром рахуваны сут на милярд зл. Проєкт фінансуваный буде м.ін. з державного буджету, нацийонального фонду охороны середовиска та унійных дофінансувань. Додатково Пшемыслав Даца заапелювал до самоурядів з околиц Мысцовой о фінансову підпору проєкту.

«Світ Лемків. Етноґрафічна вандрівка по Лемковині» зас в продажы

Выдавництво Лібра рішыло зробити додрук книжкы «Світ Лемків. Етноґрафічна вандрівка по Лемковині» авторства Анджея Карчмажевского. Публикация єст пробом підсумувати етноґрафічне знаня на тему Лемків і Лемковины, ціліст прикрашают репродукуваны фотоґрафіі. Поправлену і легко одновлену версию книжкы можна замовити на сайті выдавництва.