Сумар дня на 15. червця/юнія 2022 р.

Приносиме вам сумар медияльной ґрупы ЛЕМ.фм+ на ден 15. червця/юнія 2022 р.

OСРС реаґує на слова робітників СНМ-Музею Украіньской Культуры во Свиднику

Округлый Стіл Русинів Словациі (ОСРС) опубликувал офіцийне становиско в одповіди на телевізийну реляцию «З усміхом по Словациі ІІІ», котру выемітувала державна телевізия РТВС 9. червця/юнія тр. В проґрамі выступуючы одвиділи Словацкій Нацийональный Музей – Музей Украіньской Культуры во Свиднику, де його робітниця ствердила м.ін., што русиньска і украіньска культура то єдно і тото само. В своім становиску ОСРС жадат од державной телевізиі спростуваня, в котрым буде ясно повіджене, што Русины і Украінці то два окремы народы і сут то дві спосеред 13. офіцийно вызнаных нацийональных меншын на Словациі. Реторику зрівнуваня Русинів з Украінцями ОСРС окрислил як продолжаня діянь комуністичного режіму. ОСРС так само жадат, жебы Музей во Свиднику, як державна інституция, заперестал вести подібну реторику в своіх публикациях і медияльных выступлінях, а тіж штобы Міністерство Культуры Словацкой Республикы вырішыло конкретный плян діянь, жебы веце не презентувати русиньскы артефакты в Музею во Свиднику як украіньскы. Ціле становиско ОСРС доступне до почытаня на сайті okruhly-stol.sk.

Аж до осени потягом до Мушыны під словацкы Татры

Oд суботы, 4. червця/юнія, сут привернены трансграничны вікендовы желізницьовы получыня медже Мушыном а Попрадом на Словациі. Курсы орґанізуваны сут разом Малопольском і Словацком Желізницьом. Вакацийны курсы потягів тішыли ся великым заінтересуваньом, іщы перед пандемійом потяг перевозил коло 5 тис. осіб. Получыня ґарантує вынятковы видокы на трасі і заберат пасажерів під самы Татры. Заінтересуваня получыньом і в тым сезоні не єст менше, в звязку з чым Малопольска і Словацка Желізниці рішыли продолжати переізды аж до 4. вересня/септембра.

Гортітерапія в Лабовій

Власти Лабовы, села в західній Лемковині, плянуют зреализувати парк, што го выдумали жытелі села. Буде в ним вельо рослин, а тіж конструкциі в формі пляйстрів меду. Інтересуючы будут занятя з гортітерапіі, значыт терапіі через роботу в загороді. Війт Лабовы Марта Слаба подає, што будут посаджены тіж такы рослины, до котрых будут мочы доіхати особы з неполносправністю. Буде тіж земля, де буде мож сіяти, дбати о рослины, обсервувати іх і дотыкати. Новый парк зроблят близко рікы Камениця. Проєкт інвестициі закладат тіж будову стоіск для ґаздів продаючых реґіональны выробы, а тіж будову невеликого амфітеатру.

Одзначыли війт ґміны Санкова Малґожату Малух

В минулый вікенд в Центрі Штукы Мосціце (Mościce) в Тарнові прошла торжественна ґаля, што была центральным пунктом ціломісячных святкувань Свята Малопольщы. Подія была нагодом до того, жебы выріжнити особы особливі заслужены для малопольского воєвідства. Маршалок Малопольщы Вітольд Козловскій вручал Почестны Медалі та Почестны Одзнакы Малопольского Воєвідства. Серед нагородженых бронзовым Медальом нашла ся війт ґміны Санкова Малґожата Малух, а серед осіб одзначеных срібрном Одзнаком – радный ґорлицкого повіту Роман Дзюбина.