Сумар дня на 15. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 15. грудня/децембра 2025 р.

На Святій Горі Явір поступує будова православной церкви

Працы при будові православной церкви на Святій Горі Явір фурт тырвают. О стані робіт при будові святыні інформувал владыка Паісий – архієпископ Перемышльскій і Ґорлицкій. Кєд же хвиля єст добра і не іде сніг, мож реализувати дальшы будівляны діяня. Зачал ся процес одощкуваня і забезпечыня стріхы на зиму. Дальше треба іщы купити бляху на покрытя церкви, розрахувати теслярскы роботы та выконати 5 бань і дві бічны каплиці. Каждый, хто має дяку, фурт може спомочы будову православной церкви на св. Горі Явір. Деталі найдете гев.

Нова атракция на Парковій Горі в Креници

Польскы Кабельны Желізниці PKL неодолга одкрыют нову атракцию в Креници. На верху Парковой Горы ведены сут тепер кінцьовы працы внутрі панорамічной видоковой вежы. На 36 метрах конструкциі заплянувано зовнішній тарас 360 градусів і перешкліня внутрнішнього простору, што позволит захоплювати ся краєвидом через цілый рік і при каждій хвили. Для тых, котры потрібуют кус міцнійшых вражынь, побудуваный был выступ зо шкляном підлогом. В середині буде вінда, котра уможливит доступ для каждого без вынятків, але і одкрыты зовнішні сходы для обзераня краєвиду. Працы ідут скорше, як закладали. Тырвают послідні роботы звязаны з выкінчыньом внутрішнього простору і заґаздуваньом терену. Як подало PKL, рыхтуют ся тіж до позысканя позволіня на хоснуваня. Одкрытя новой атракциі єст плянуване на першый квартал 2026 р., а необхідны працы звязаны з демонтажом старого телекомунікацийного машту і заґаздуваньом терену плянуваны сут на половину будучого рока. При вежы буде ся находила зелена зона одпочынку з пляцом, лавками і зеліньом. З новой атракциі буде мож видіти Креницю, Бескід, а аж і Татры. На вершку вежы найдут ся телекомунікацийны антены.

Выголошыня лавреатів Літературной Нагороды ім. Мариі Мальцовской

Днес од 10.00 год. в просторях Інституту Русиньского Языка і Літературы Пряшівского Університету проходит презентация лавреатів 12. річника конкурсу о Літературну Нагороду ім. Мариі Мальцовской. Каждого рока орґанізує го Сполок Русиньскых Писателів Словациі, і можут ся до него зголошувати авторы зо Словацкой Республикы з творами, котры іщы не были перед тым публикуваны. До конкурсу приступуют вызнаны русиньскы авторы, як і дебютанты.

Лемкы взяли участ в ліґницкій Велиі Народів

Як інформувало Стоваришыня Лемків, Лемкы, в тым і члены орґанізациі брали вчера участ в 24. Велиі Народів, котра прошла в Королівскій Сали Рицарской Академіі в Ліґници. Того рока до спільного стола сіли м.ін. Лемкы, Полякы, Портуґальці, Іспанці, Німці, Украінці, Жыды, Американе, жытелі Анґолі, Ніґериі і Мозамбіку. Цілю подіі єст близше познати своіх сусідів. Жытелі єдного міста, котры ріжнят ся традициями, культуром ци реліґійом, вказуют своі звыкы і тото, як выглядают свята в ріжных родинах. Ініциятором і орґанізатором Велиі Народів єст Стоваришыня Жены Европы, а свою участ в подіі має тіж Уряд Міста і Ліґницкій Центр Культуры.

Концерт ансамблю Серенча в Домініковицях

Стоваришыня Помоциі Лемківской Творчости «Серенча» просит на концерт Лемківского Фолькового Ансамблю Серенча пн. «Лемківской Вечер – музика і традиция». Концерт одбуде ся в найблизшу неділю 21. грудня/децембра о 17.00 год. в Домі Культуры в Домініковицях.

Джерело фотоґрафіі: FB Arcybiskup Paisjusz