Сумар дня на 16. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 16. грудня/децембра 2022 р.

Дальшы ревізиі СБУ – русиньска фана, русиньскє цедечко, наклийка ЛЕМ.фм

В середу 14. грудня/децембра Служба Безпекы Украіны (СБУ) робила дальшы ревізиі в будинках, якы належат до Украіньской Православной Церкви, тіж і на териториі Хресто-Воздвиженьского собору в Ужгороді, якого настоятельом є отец Димитрий Сидор, знаный з русиньского руху. Хоц СБУ офіцияльно оголосила, же подія была заміряна на проросийску диверсию і дальшы з тым повязаны діла, перешкаджали ій в Ужгороді русиньскы артефакты. На фотоґрафіях опубликуваных СБУ найти мож русиньску фану. Окрем того на знимках СБУ нашло ся примірно цедечко русиньского співака Владислава Сивого, нотация Гымну підкарпатскых Русинів з меджевоєнного періоду, пропозиция нового русиньского ербу з книжкы Міляна Яна Піліпа, а аж і наклийка нашого радия ЛЕМ.фм. Припоминаме, же Русины од початку поставили ся проти войні. Ясно осудили войну русиньскы орґанізациі на Украіні, в европейскых державах і Пілнічній Америці, в тым чыслі і сам Світовый Конґрес Русинів. Назвали они аґресором Росийску Федерацию і высловили свою солідарніст з Украінцями і дальшыма нациями, котры жыют на Украіні. На жаль, мимо ясной позициі Русинів односно войны, СБУ подля опубликуваных знимок узнає русиньску символику ци співанкы за «загорожыня» ци «диверсию». Більше на тоту тему чытате в дописі на нашым портали.

Верховна Рада Украіны приняла закон о нацийональных меншынах

А лем ден скорше, в віторок 13. грудня/децембра Верховна Рада Украіны приняла закон о нацийональных меншынах, котрый є ключовым условійом про вступ до Европейской Уніі. Подля депутата парляменту і члена комітету про людскы права, деокупацию і реінтеґрацию дочасно окупуваных територий, нацийональны меншыны і медженародны односины – Тараса Тарасенко, документ специфікує права нацийональных ґруп на Украіні і дає ґаранциі іх етнічного і культурного розвитку. Подля него «на никого ся не забуде і не буде істнувала нияка дискримінация». Припомнийме, же дотля Русины на Украіні не были вызнаны і не належат ім ниякы права. Фотоґрафіі русиньскых символів опубликуваны СБУ сут так само явным приміром дискримінациі Русинів на Украіні.

Свята в нашых горах

Бєщадскій Народный Університет просит на цикль одкрытых выкладів «Свята в нашых горах». Подія буде проходила в днях од 16. до 18. грудня/децембра в Музею Народного Будівництва в Саноку. На днес, на 17.00 год. заплянуваный є першый з выкладів, про хануковы звыкы в бєщадскым реґіоні. Заран о 10.00 год. зачнут ся выклады про карнаваловы звыкы і танці в горах і різдвяны звыкы Погірян і Долинян, а пак буде доповід пн. «Медже церквом, костелом а синаґоґом». В неділю одбудут ся наступны три выклады: «Натура в різдвяній традициі в бєщадскым реґіоні», «Таємниці церкви. Істория, традиция, архітектура, штука, символика» і послідній пн. «Різдвяны звыкы в Бойків і Лемків», якій выголосит Мариянна Яра. Подіі товаришыт Різдвяный Ярмак на Ґалицийскым Рынку.

Комунікат Бєщадского Нацийонального Парку

Як подал вчера Бєщадскій Нацийональный Парк, верства снігу в горах має тепер середньо 15-30 цм, а в дакотрых місцях аж і до 70 цм. Під снігом є ледова покрыва, зато рекомендуют взяти зо собом рачкы і трекінґовы кыйкы. Шляк з Волосатого на Тарницю є выдоптаный, але шляк з Перевалу під Тарницьом в сторону Ґопровского Перевалу є уж засыпаный снігом, што сігат колін. Зато же дни сут тепер барз короткы, працівникы Парку рекомендуют рушати рано і выберати коротшы, выдоптаны одтинкы шляків.

Фот. Бєщадскій Нацийональный Парк