Сумар дня на 16. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 16. грудня/децембра 2024 р.

Добило серце Івана Дзядика

З жальом інформуєме, што 12. грудня/децембра вмер Іван Дзядик, долголітній член Стоваришыня Лемків, писменник, участник культурного жытя Лемків в Польщы. Покійный вродил ся в 1939 р. во Фльоринці, пак з родином был выселеный на захід, до Михалова. В лемківскым руху присутный был уж під конец 50. років ХХ ст. Активно спілдіял при орґанізуваню Огниск, а пак Лемківской Ватры на Чужыні в Михалові. Коли основане было Стоваришыня Лемків, влучыл ся в його діяльніст. Мож го было видіти на дощках Театру Стоваришыня Лемків, на сцені і попри ній вчас Лемківскых Ватр в Михалові, першых Медженародных Бієнале Лемківской/Русиньской Культуры в Креници ци зындранівского Од Русаль до Яна. Был участником Світовых Конґресів Русинів як член делеґациі Стоваришыня Лемків. Публикувал м.ін. на «Лемківскій Сторінці» ґазеты «Наше Слово», в часописі Стоваришыня Лемків «Бесіда» ци «Загороді» Музею Лемківской Культуры в Зындрановій. Выдал дві збіркы «Жартів і оповідань» і книжку «Свята Земля». За одданіст і вірніст православній Церкви был нагородженый церковныма одзначынями. З його ініциятивы на двох фльориньскых цмонтерях были одкрыты Промапятны Кресты припоминаючы о бытности Русинів в тым селі. В 2019 р. Іван Дзядик отримал Нагороду ім. Никыфора – Епіфана Дровняка за труд жытя одданый для лемківской культуры. В 2024 р. як староста мал чест класти оген вчас розпаліня 44. Лемківской Ватры на Чужыні в Михалові. Шыршу біоґрафію Покійного прочытате на нашым портали. Вічна Памят!

«Іконы надіі. Пут віры в Ватиканьскых Музеях»

Од днес, 16. грудня/децембра, до 16. лютого/фебруара 2025 р. буде в Костелі святой Аґнесы в Аґоне в Римі одкрыта выстава ікон пн. «Іконы надіі. Пут віры в Ватиканьскых Музеях», котру кураторско вєдно приготовили Анна Піццамано і Петро Береш – родак з Підкарпатя, якій долгы рокы є робітником Ватиканьскых Музеів. Выстава єст повязана зо святкуваньом в 2025 р. через Католицку Церков Святого Рока. Ювілейный 2025 рік з моттом Путникы надіі был выголошеный булльом Папы Римского Франициска. Веце на тоту тему прочытате в дописі на нашым портали.

46. Антрополоґічный Маґєль на тему прониканя культур, границ і меншын

Днес в Кракові одбуде ся 46. Антрополоґічный Маґєль, орґанізуваный Науковым Кружком Студенів Етнолоґіі і Культуровой Антрополоґіі Ягайлоньского Університету. Стріча пн. «Медже світами. Очывидны неочывидности в культурі» пройде з участю др габ. Олены Дуць-Файфер, проф. Ягайлоньского Університету, лемківской вченой, поеткы, діячкы, літературознавчыні, яка занимат ся культуром етнічных меншын і меншыновым дискурсом. Темом 46. Антрополоґічного Маґля буде перениканя ся культур, границ, іх перекрачаня ци затераня. Порушены будут літературны, языковы і реліґійны обшыри, як і тема стрічаня уявлінь з фактичным станом. Подія одбуде ся в Cafe Szafe в Кракові, початок о год. 17.30.

ХVIII Велия Народів і Культур в Ґожові Великопольскым

В минулу суботу 14. грудня/децембра в Ґожові Великопольскым прошла 18. едиция Велиі Народів і Культур. Каждого рока в подіі, котра проходит в Містным Центрі Культуры, берут участ члены етнічных і нацийональных меншын, котры ділят ся свойом культуром, музиком і кухньом. В тым році за єдным столом сіли м.ін. Лемкы, Ромы, Кресовякы, Буковіньскы Ґуралі, Львівякы, Вільнякы, Украінці ци Полешукы. Орґанізатором подіі єст Стоваришыня Творців і Приятелів Циґаньской Культуры в Ґожові Великопольскым. Цілю подіі єст інтеґрация, а предовшыткым припоминая і утырваляня різдвяных традиций і страв нацийональных меншын і етнічных ґруп.