Сумар дня на 16. липця/юлия 2021 р.

Приносиме вам сумар медияльной ґрупы ЛЕМ.фм+ на ден 16. липця/юлия 2021 р.

Закрыют повітову дорогу 1504К Ропа-Вавка-Фльоринка

Як інформує Повітове Староство в Ґорлицях, в Ропі зачынают роботы при стабілизациі осувиска. З той причыны од 20. липця/юлия од 8 год. рано цілковито закрыта буде повітова дорога 1504К Ропа-Вавка-Фльоринка. Окрем стабілизациі осувиска, буде одбудувана дорога і перепуст. В звязку з веденыма роботами вызначены сут обізды: одтинком повітовой дорогы 1498К Ропа-Высова-Бліхнарка-Границя Державы, дорогом повітовом но. 1500К Ропа-Брунары і одтинком повітовой дорогы но. 1503К Фльоринка-Ізбы по страні ґорлицкого і новосандецкого повітів. Дорога буде заперта до одкликаня – предвидуваный час тырваня робіт то около штырі місяці.

Ювілейна едиция Музикы Заклятой в Дереві

Ювілейна, 15. едиция Фестівалю «Музика Заклята в Дереві» на Пути Деревяной Архітектуры в Малопольщы, якого інавґурация одбыла ся 6. червця/юнія концертами в Бічу і Бінаровій, проходит в тым році в дакус зміненій формулі. Концерты не проходят в кажду неділю, а лем в єден вікенд 6.-8. серпня/авґуста. Як все – на фестівалю не бракне лемківской музикы, котру в тым році буде мож почути в Мазярскій Загороді в Лоси завдякы Оркєстрі Святого Миколая. Пленеровый выступ в Музею Пчолярсва в Стружах рыхтує родинна Капеля Тімінґерю. Проґрам пн. «Німецкій порядок контра італияньскій порядок» запрезентує в бароковых інтерєрах костела св. Михала Архангела в Шальовій тріо в скаді: Артур Плінта (контратенор), Аґнєшка Подлуцка (бароковы гушлі) і Наталия Ольчак (клявесин). Фіналом Фестівалю буде концерт ансамблю Раз Два Три, якій пройде на пленеровій сцені при костелі свв. Пилипа і Якова в Санковій. Вступне на концерты дармо.

«Вколо Новосільского» – выстава і семінар в Музею Ікон в Варшаві

В четвер, 8, липця/юлия, в Музею Ікон в Варшаві была одкрыта выстава «Богородиця з пророками» фреск авторства Юрия Новосільского з краківской православной парохіі Успіня Пресвятой Богородиці та семінар «Вколо Новосільского» посвяченый Богородиці в теолоґіі і кумштови православной Церкви. Ікона презентувана на выставі была написана Новосільскым для православной парохіі Успіня Превятой Богородиі в Кракові в 1977 році. В рамках семінара вызвучали два рефераты «Богодородиця в теолоґіі і досвіді православной Церкви» о. Генрика Папроцкого та «Тіло в іконі і штуці Юрия Новосільского» Віталия Міхальчука. В рамках подіі одбыл ся і концерт богородичных гымнів, якы походят з традициі античного монодичного співу, котры запрезентувал Лукаш Гайдученя. Подія была трансмітувана нажыво. Фільм з одкрытя выставы, концерту і семінара єст фурт доступный на фейсбуковым профіли Музею Ікон в Варшаві.

18. Ярмак Ікон на Саноцкым Рынку

Того рока одбуде ся уж 18. едиция Ярмаку Ікон в Саноку. Саноцкій Рынок заполнит ся ремісничыма, малярскыма, ткацкыма выробами, іконами, різбами ци реґіональныма стравами в вікенд 31. липця/юлия і 1. серпня/авґуста. Ярмакови будут товаришыти традицийны концерты, варштаты і атракциі для діти. Імпреза буде проходила згідно з санітарныма рекомендациями. Детальны інформациі про подію являт ся неодолга на сайті www.sanok.pl і фейсбуковым профіли Мiasto Sanok.