Сумар дня на 16. липця/юлия 2025 р.

Приносиме вам сумар медияльной ґрупы ЛЕМ.фм+ на ден 16. липця/юлия 2025 р.

Ремонтовы роботы на ватряным поли

Помалы ближыт ся час 45. Лемківской Ватры на Чужыні в Михалові. Орґанізаторы допинают проґрам подіі і рівночасно працуют над ватрядным пляцом. Перед парома днями стоваришакы і волонтеры вели будовляно-ремонтовы роботы при будинку зо сценом та при будинку, в котрым находит ся сідиба орґанізаторів. При сцені выляли новый бетон. Обкопали і вырівнали простір докола мурів обох будинків. Припомнийме, што тогорічна Лемківска Ватра на Чужыні в Михалові одбуде ся в днях од 8. до 10. серпня/авґуста, значыт в другій серпньовый вікенд. Неодолга подаме дальшы деталі проґраму подіі.

Новы никыфоры в Етноґрафічным Музею в Варшаві

Державный Етноґрафічный Музей в Варшаві купил 50 ообазів выдатного лемківского маларя – Епіфана Дровняка. Роботы, котры придбал Музей, походят од Яна Фрончака і сут частю колекциі збераной выдатным різбярьом – Альфонсом Карным. Кінцьом 40. років ХХ ст. різбяр Карный особисто купил іх од Никыфора. Образы походят з 20., 30., 40. і початків 50. років ХХ ст. Вшыткы зроблены сут техніком ґвашу і акварелі, і – як подає Музей – «заховали первістну глубоку ´аксамітну´ барву, котра так захоплює любителів творчости Никыфора». Образы Никыфора з колекциі Альфонса Карного были презентуваны на выставі «Никыфор» в ґалериі Zachęta в 1967 році. По його смерти іщы двараз в варшавскых ґалериях, а перед 10 роками в ЗША. В роках 2017-2022 колекция находила ся в депозиті Етноґрафічного Музею в Варшаві – єй част была презентувана на выставі «Никыфор. Маляр над малярями» на зламі 2021 і 2022 рока. В найблизшым часі выбраны роботы з той колекциі найдут ся на черговій выставі в тым музею – буде то шырока выстава посвячена сучасній лемківскій штуці. Деталі подаме пізнійше.

Вакацийный автобус з Крениці до Мушыны

Перед тыжньом місто Мушына урухомило вакацийну курортну автобусову комунікацию. Автобусами мож іздити на трасі Крениця-Мушына. Автобус з Крениці має затриманкы перед парома готелями, а кінцьовый – находит ся на басенах Запопрядя Мушына. Містны автобусы, котры сут в диспозициі Мушыны, то модерны електричны поізды выпосажены в климатизацию, огріваня і моніторінґ. Як подає бургомайстер Мушыны Ян Ґольба, як буде заінтересуваня атракциями Мушыны, сут в силі высылати своі автобусы по гостів з готелів і пенсийонатів тіж в Злоцкым ци Жеґєстові.

В Высочанах не хотят копяльні

Даміян Амброжы, шолтыс села Высочаны на східній Лемковині, зберат підписы серед мешканців і осіб підпераючых протест, під онляйновом петицийом до власти ґміны Команча, котрій підписаны выражают против взглядом реактивациі одкрывковой копальні пісковця на обшыри місцевости. «Плянувана копальня має діяти лем парудесят метрів од нашых хыж, ділянок і паствиск» – чытаме в петициі. Шолтыс арґументує, же копальня вяже ся з постійным галасом, порохом і дырґанями, котры шкодят здоровлю і жытю, што є то терен будучый жытлиском для хороненых ґатунків звірят. Подає тіж, што ґміна Команча зобовязала ся до рекультивациі терену, не до його промысловой реактивациі і што не были проведены ретельны соспільны консультациі в справі чергового урухомліня копальні. Высочаны то лемківскє село, якє было локуване коло 1539 рока, сусідує з селами Куляшне, Мокре ци Полонна. Перед выселінями в Высочанах жыло коло піл тисяча Лемків. Місцева деревяна церков згоріла в 1944 році. Нову, мурувану, побудували в 1994 році. Актуальні в селі находит ся стаднина кони і пару аґроґаздівок. Є гын тіж затриманка желізниці леніі Загіря-Меджелабірці.

Фот. Фб-профіль Стоваришыня Лемків